17.07.2016
Tadhlaidh buill de Chomataidh Dàimhean Taobh a-muigh aig Pàrlamaid na h-Alba air a’ Bhruseal Dimàirt seo tighinn mar phàirt den sgrùdadh aca air a’ bhuil a bheir Brexit air Alba.
Bidh buill na comataidh
a’ coinneachadh ri tosgairean bhon Aonadh Eòrpach agus bho bhall-stàitean a’
Chaidreibh Eòrpaich airson Saor-mhalairt (EFTA) a bharrachd air grunn
bhuidhnean cudromach eile sa Bhruiseal.
Thuirt Seònag NicAilpein BPA, Neach-gairm na Comataidh Eòrpaiche is Dàimhean Taobh
a-muigh:
“Bhòt 62 sa cheud de luchd-bhòtaidh
ann an Alba a dh’fhantainn anns an Aonadh Eòrpach. Air an adhbhar sin a-mhàin,
tha e cudromach a thuigsinn dè na roghainnean a th’ ann gus an t-àite aig Alba
anns an Roinn-Eòrpa a dhìon.
“Anns na coinneamhan
againn anns a’ Bhruiseal, bidh sinn a’ sireadh a bhith a’ fosgladh modhan
conaltraidh leothasan anns an Roinn-Eòrpa a bheir na co-dhùnaidhean cudromach,
air chor ’s gum faod còmhradh a bhith againn air mar a riochdaichear leas na
h-Alba anns na còmhraidhean a thèid air adhart.
“Anns an t-seisean
againn nas anmoiche sa mhìos seo, bidh cothrom againn a chluinntinn bho na
prìomh raointean—nam measg foghlam aig an àrd ìre, ionmhas agus gnìomhachas.
Bidh sinn a’ togail ceistean is iomagainean nan raointean sin anns na
coinneamhan againn le Riaghaltasan na h-Alba is na Rìoghachd Aonaichte.”
Tha a’ Chomataidh a’
dèanamh an tadhail mar phàirt de phrògram de dh’obair a tha a’ Chomataidh a’
toirt air adhart fhad ’s a tha Taigh an Ròid air fosadh.
Air 28 Iuchar, bidh
seisean-fianais aig a’ Chomataidh anns an cluinnear bho
riochdairean nam prìomh raointean air a bheilear a’ saoilsinn gum bi Brexit a’
toirt buaidh.
Thathar an dùil gum bi,
am measg an luchd-fianais,
riochdairean bho Chomann an Uisge-beatha Albannaich agus bho Virgin Money.
Cùl-fhiosrachadh
O chionn goirid,
dh’fhoillsich a’ Chomataidh prògram de dh’obair air mar a chuireadh fon
phrosbaig èifeachdan an reifrinn ann an Alba.
Thathar an dùil
cuideachd seiseanan-fianais a chumail le Prìomh Mhinistear na h-Alba agus le
Ministearan bho Riaghaltas na Rìoghachd Aonaichte. Foillsichear tuilleadh
fiosrachaidh air na coinneamhan seo aon uair ’s gu bheil iad deimhinne.
Tha a’ Chomataidh
cuideachd air pròiseact-rannsachaidh iarraidh air dè a’ bhuil a thig bho
Bhrexit, agus bidh a’ Chomataidh an sàs ann an co-chomhairleachadh farsaing
poblach air chor ’s gun cluinnear bho phoball na h-Alba dè bhios e a’
ciallachadh dhaibh gum bi an dùthaich a’ fàgail an Aonaidh Eòrpaich.
Fios conaltraidh
Fios do na meadhanan
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: