09.12.2011
Tha an aithisg le Comataidh an Ionmhais air an Ath-bhreithneachadh air Caiteachas na h-Alba 2011 agus air Dreachd Buidseit 2012-13 air fàilte a chur air a’ chuideam a chuir Riaghaltas na h-Alba air cosg casgach agus am maoineachadh de £500 millean airson trì maoinean ùra.
Tha iad seo air an comharrachadh mar chumail a' dol leis a' Mhaoin Atharrachaidh; Maoin Atharrachadh air Gnìomhan sna Tràth Bhliadhnaichean agus Maoin Atharrachadh air Lùghdachadh Eucoirean às ùr. Thug a' Chomataidh an aire, ge-tà, gun tug cuid de luchd-fianaise rabhadh gu bheil e tuilleadh is tràth airson a ràdh gur ionann seo agus "gluasad bunaiteach" gu cosg casgach mar a chuir an Riaghaltas an cèill.
Tha a' Chomataidh uime sin ag iarraidh soilleireachaidh a thaobh co dhiubh a thig am maoineachadh de £500 millean à airgead ùr no às a’ chaiteachas a tha ann mar-thà. Tha i cuideachd ag iarraidh faighinn a-mach cò a nì rianachd air na trì Maoinean agus dè na toraidhean a shocraich an Riaghaltas.
Tha a’ Chomataidh ag aithneachadh cuideachd gu bheil eagrachaidhean san roinn phoblaich ag iarraidh barrachd stiùiridh is seòlaidh bho Riaghaltas na h-Alba a thaobh mar a nithear cinnteach gun tig "gluasad bunaiteach" gu cosg casgach gu buil tro bharrachd obrach amalaichte agus nas lugha de dhòigh-smaoineachaidh dhùinte.
Thuirt Neach-gairm na Comataidh Coinneach Gibson BPA:
“Tha sinn a' cur fàilte air buidseat Riaghaltas na h-Alba agus air a' chuideam a chuireas e air cosg casgach. Tha sinn ag iarraidh soilleireachaidh air caochladh cheist, ge-tà, mar thoradh air fianais a fhuair sinn.
“Nam measg seo tha fiosrachadh nas mionaidiche air maoineachadh airson nan trì Maoinean ùra aig an Riaghaltas agus na dùbhlain gus a dhèanamh cinnteach gum bi an clàr-obrach mu chosg casgach air a neadachadh thar lìbhrigeadh nan seirbheisean poblach agus tha e san amharc aig a’ chomataidh dearcnachadh a dhèanamh air adhartas a h-uile gin de na Maoinean.”
Rinn a’ Chomataidh barrachd mholaidhean, nam measg:
- Ùrachadh a h-uile sia mìosan bho fho-chomataidhean a' Chaibineit air adhartas a thaobh molaidhean Choimisean MhicRisnidh a chur an gnìomh, gu sònraichte an claonadh a dh'ionnsaigh barrachd obrachaidh eadar buidhnean-gnìomha gus dòigh-smaoineachaidh dhùinte a lùghdachadh.
- Bu chòir gum biodh Riaghaltas na h-Alba an ceannas air an deasbad phoblach mun fheum air tasgadh is dì-thasgadh gus a dhèanamh cinnteach gum bi cosg casgach aig cridhe lìbhrigeadh nan seirbheisean poblach anns an ùine fhada.
- Bu chòir gun toireadh Riaghaltas na h-Alba soilleireachadh mu na dòighean a tha e a’ cur an alt a chruthaicheas deagh chleachdas thar nam buidhnean uile agus bunait làidir de dh'fhiosrachadh.