28.02.2012
Tha Comataidh Eaconomaidh, Cumhachd agus Turasachd Pàrlamaid na h-Alba air dragh a nochdadh a thaobh comas coileanaidh nan targaidean turasachd a stèidhich Riaghaltas na h-Alba.
Ann an aithisg a tha a’ sgrùdadh cuid de na cuspairean a tha a’ toirt buaidh aig an àm seo air turasachd na h-Alba, fhuair a’ chomataidh fianais bho Thurasachd na h-Alba nach robh an àireamh fàis 50% a chaidh a stèidheachadh ann an 2006 idir cothromach anns an t-suidheachadh gnàthaichte.
Gus dèiligeadh ri mì-chinnt sam bith, tha a’ chomataidh air iarraidh gum faigh iad aithrisean bliadhnail bho Thurasachd na h-Alba a thaobh adhartas ann a bhith a’ coileanadh na targaid, a bharrachd air planaichean mu bhith a’ dèiligeadh ri geàrr-shuim sam bith a dh’fhaodadh a bhith ann.
Chuala a’ chomataidh cuideachd mun bhriseadh-dùil a tha am measg luchd-cleachdaidh sa ghnìomhachas mun duilgheadas a th’aca dàta turasachd Albannach earbsach agus ùraichte fhaighinn.
Thuirt Neach-gairm na Comataidh Murchadh Friseal BPA: “Tha ròl deatamach aig turasachd ann an eaconomaidh na h-Alba. Tha e a’ toirt a-steach luach timcheall air £4.2 billean de theachd a-steach agus a’ toirt obair do timcheall air 215,000 neach.
"Ged a tha a’ Chomataidh a’ cur fàilte air targaid fàs dòchasach 50%, tha dragh oirnn nach eil soilleireachd ri fhaicinn anns an raon a thaobh comas coileanaidh na targaid seo.
“Tha cothrom mòr ann thairis air na bliadhnaichean ri thighinn a bhith a’ taisbeanadh roinn turasachd na h-Alba. Gus an cothrom as fheàrr fhaighinn air an seo, feumaidh Riaghaltas na h-Alba a bhith ag obair leis a’ ghnìomhachas turasachd gus bun-fiosrachaidh meadhanach a sholarachadh gus tuigse a thoirt seachad air gluasadan taobh a-staigh na roinne."
Le grunn phrìomh thachartasan gu bhith a’ dol air adhart ’s na bliadhnaichean ri teachd, chur a’ chomataidh fàilte air an obair dealbhaidh a thathas air a dhèanamh gu ruige seo gus dìleab sheasmhach a chruthachadh dha Alba.
Bhiodh ro-innleachd Bliadhnaichean Soirbheachail Turasachd na h-Alba deatamach ann a bhith a’ toirt comas dha gnìomhachasan turasachd buaidh nam prìomh thachartasan sin àrdachadh.
Ach, bha a’ chomataidh soilleir gu robh feum air barrachd mion-fhiosrachaidh mun ro-innleachd agus na h-amasan a bha na cois gus am faighear a’ bhuaidh as ion-mhiannaichte às.
Cùl-fhiosrachadh
Chum a’ chomataidh seisean fianais aon-uair air 23 Samhain 2011.
Ath-sgrìobhadh den t-seisean fianais (551KB pdf)
Chaidh an t-seisean eagrachadh gus fòram a sholarachadh airson sealadh tùsail air suidheachadh turasachd na h-Alba agus, gu sònraichte, a’ bhuaidh a tha air a bhith aig a’ chrìonadh gnàthaichte san eaconomaidh.
Tha a’ chomataidh a’ foillseachadh na h-aithisg air thoiseach air Seachdain Turasachd na h-Alba, a tha a’ tòiseachadh Diluain 5 Màrt.
A rèir Sgrùdadh Turasachd Bhreatainn o chionn ghoirid, dh’èirich an àireamh de luchd-turais ann an Alba 8% anns a’ chiad naoi mìosan de 2011.
Tron àm seo, dh’èirich na chosg luchd-turais bhon chòrr den RA ann an Alba 21% fhad’s a thuit na chosg luchd-turais bho thall thairis 6%.
Fhuair an aithisg cuideachd fianais mu na ceumannan a thathas a’ gabhail gus sgilean, foghlam is adhartas obrach àrdachadh anns na roinnean a bharrachd air fiosrachadh mun obair a thathas a’ dèanamh gus bun-structair is ceanglaichean air feadh na h-Alba adhartachadh.
Read the report
- 2nd Report, 2012 (Session 4): Issues affecting Scottish Tourism - Initial Report