01.03.2012
Tha muinntir na h-Alba a tha a' faighinn cùram slàinte is sòisealta am measg na feadhnach a thathar a' brosnachadh am beachd a chur an cèill do Chomataidh Slàinte is Spòrs an-diugh agus a' chomataidh sin a' sireadh fianais airson Bile Cùram Sòisealta (Taic Fèin-Stiùirichte)(Alba).
'S e amas a' Bhile cùram slàinte is sòisealta aonachadh gu ìre nas dlùithe agus tuilleadh roghainn is smachd pearsanta a thairgsinn don 200,000 inbheach agus 16,000 chloinne (thathar a' meas) a tha an-dràsta a' faighinn a h-uile seòrsa chùram, leithid banaltramachd is biadh aig an taigh agus cuideachadh do chloinn le duilgheadasan dìth-conaltraidh.
Nì a' chomataidh sgrùdadh air a' Bhile a thaobh an leig e san dà-rìribh le daoine an taic a tha iad ag iarraidh fhaotainn, aig àm a thathar ga h-iarraidh agus ann an àite sa bheilear ga h-iarraidh. Cuideachd, tha am Bile a' cur dleastanais air ùghdarrasan ionadail ceithir roghainnean a thairgsinn do neachan air leth a thaobh cur air dòigh agus cosgaisean an cuid cùraim.
Thuirt Neach-Gairm na Comataidh, Donnachadh MacNèill BPA:
"Bu mhath leinn cluinntinn o na mìltean de dh'inbhich is de chloinn a gheibh cùram sòisealta is taic, na daoine air am bi buaidh dhìreach aig a' Bhile seo, a thaobh a bheil iad a' creidsinn gun cuir am Bile feabhas air am beatha.
"A bheil iad airson 's gum pàigh ùghdarras ionadail airgead a-steach don chunntas-bhanca phearsanta aca, a thèid a chleachdadh gus an taic fhèin a cheannachd? A bheil iad den bheachd gu bheil pàiste 16 bliadhna dh'aois comasach air an taic fhèin a thaghadh is a stiùireadh, agus pàigheadh airgid cuideachd? Tha sinn a' brosnachadh a h-uile duine air am bi buaidh aig a' Bhile am beachdan a chur an cèill."
Am measg nan ceistean a tha Comataidh Slàinte is Spòrs airson cur ri daoine tha -
1. Bheil taobh agad ris a' Bhile agus na th' ann?
2. Dè do bheachd air na ceithir roghainnean a thathar a' moladh sa Bhile a thaobh taic fèin-stiùirichte?
3. An e do bheachd gun tig an atharrachadh a tha an Riaghaltas ag iarraidh an cois a bhith a' leasachadh siostam a' phàigheadh dhìrich a rèir an latha an-diugh?
Gheibhear barrachcd fiosrachaidh air a' ghairm fianais a tha air duilleagan na Comataidh.
Cùl-sgeul
Chaidh Bile Cùram Sòisealta (Taic Fèin-Stiùirichte)(Alba) a thoirt a-steach sa Phàrlamaid Albannach air 29 Gearran 2012. Tha Comataidh Slàinte is Spòrs airson 's gun tèid fianais sam bith mun Bhile a chur chun a' chlèirich ro 24 Giblean.
Thathar a' cur fianais air sa Ghàidhlig.
Co-cheangailte
- Social Care (Self-directed Support) (Scotland) Bill
- Social Care (Self-directed Support) (Scotland) Bill call for written views
- Health and Sport Committee