Agus tinneas-cridhe mar an dàrna galar as marbhtach ann an Alba, 's aillse mar a' chiad ghalar, bheir na BPAan sùil air carson a bhios nas lugha de chothrom aig cuid de dhaoine air seirbheisean eòlas-cridhe na càch, agus air ciamar a ghabhas na seirbheisean seo a lìbhrigeadh air dòigh nas èifeachdaiche.
Thuirt Neach-gairm na Comataidh, Iain Gray BPA:
"Ged a thuit àireamh nan daoine a fhuair bàs o na diofar sheòrsaichean de thinneas-cridhe ann an Alba le mu 40% thar nan deich bliadhna a dh'fhalbh, 's e ar n-àireamh fhathast as àirde ann an Taobh Siar na h-Eòrpa - 's tha na figearan fiù's nas àirde am measg nam fireannach ann an Alba, am measg nan cinnidhean eitnigeach agus am measg nan daoine a tha a' còmhnaidh anns na h-àiteachan as miosa dheth.
"Air na h-adhbharan sin, tha beachd làidir aig ar comataidh a thaobh a bhith a' faighinn a-mach à Dùn Èideann a dhol a dh'èisteachd gu dìreach ri easlaintich agus ri luchd-slàinte proifeiseantach san NHS. Tha ar comataidh a' dol a dhèanamh rannsachaidh a thaobh carson a tha nas lugha de chothrom aig cuid de dh'euslaintich air seirbheisean eòlas-cridhe seach càch, agus gus faighinn a-mach an gabhadh barrachd fhaotainn às luach an airgid a thaobh lìbhrigeadh nan seirbheisean seo."
Lean Mgr Gray air:
"'S i an fhìrinn chruaidh gu bheil na ràtaichean a thaobh leigheas tinneas-cridhe 's a leithid gu math nas lugha sna h-àiteachan as miosa dheth ann an Alba le 20% de dhaoine a' faotainn nas lugha leigheas san NHS na bhiodh dùil. Aig ceann eile na sgèile, tha figearan aig Buidheann Sgrùdaidh na h-Alba ag innse dhuinn gum bi euslaintich a tha a' fuireach sna h-àiteachan as fheàrr dheth a' faotainn 60% nas motha de chothrom air seirbheisean eòlas-cridhe, rud a tha a' ciallachadh nach eil cothrom air leigheas co-ionann idir.
"Aithnichidh sinne gu bheil ròl aig an dà chuid euslaintich agus luchd-slàinte proifeiseantach ann a bhith a' leasachadh seirbheisean eòlas-cridhe, 's uime sin sa mhadainn air ar turas cuiridh sinn beagan tìde seachad ann an Druim a' Chapaill leis a' phròiseact Cum gu Math agus cuide ri luchd-obrach agus euslaintich on phròiseact phìolaiteach Cùram Ro-Làimh Muinntir Taobh Deas na h-Àisia. Cuideachd, cluinnidh sinn mu dheidhinn mar a bha do na dotairean ciad-sreath a bhios ag obair ann an cuid de na h-àiteachan as miosa dheth ann an Alba, agus coinnichidh sinn ri Buidheann Broilleach, Cridhe is Stròc na h-Alba.
"San fheasgar bidh làn-choinneamh fhoirmeil chomataidh air chois ann an Seòmraichean Chathair Ghlaschu le fianais o bhuidhnean-cathrannais cridhe leithid Buidheann Cridhe Bhreatainn, o bhùird-slàinte mar NHS Ghlaschu 's a' Chluaidh, agus o Riaghaltas na h-Alba."
Tha dùil aig a' chomataidh gum foillsich iad fianais on rannsachadh air Seirbheisean Eòlas-Cridhe an dèidh fosadh an t-samhraidh.
Mion-fhiosrachadh air Turas Ghlaschu
Dihaoine 22 Ògmios
Bidh buill na comataidh ri trì tursan-fiosrachaidh gu:
· Buidheann Broilleach, Cridhe is Stròc na h-Alba.(BCSA): Coinnichidh buill ri euslaintich agus ri luchd-obrach taice gus bruidhinn riutha mu mar a chaidh dhaibh.
· Pròiseact Ceann Domhainn agus Buidheann P3: Tachraidh buill ris an Oll. Watt, an Dr. Susan Langridge agus an Dr. Jim O' Neil on phròiseact Ceann Domhainn gus deasbad a chumail mu dheidhinn nan dùbhlan roimh dhotairean a tha ag obair gus dol an gleac ri tinneas-cridhe sna coimhearsnachdan as miosa dheth ann an Alba. Cuideachd, bidh a' bhuidheann seo a' beachdachadh air freagairtean cheisteachan bhon Bhuidheann 'P3', Patient Partnership in Practice / Com-pàirtichean Slàinte nan Euslainteach às Colaiste Rìoghail nan Dotairean ann an Alba.
· Prògram Cum gu Math agus pròiseact pìolaiteach Cùram Ro-Làimh Muinntir Taobh Deas na h-Àisia: Coinnichidh cuid de na buill ri luchd-obrach san raon sin cho math ri aona euslainteach a tha a' gabhail pàirt ann am prògram Cum gu Math aig Riaghaltas na h-Alba. Coinnichidh a' bhuidheann riuthasan a tha an-sàs ann am pròiseact pìolaiteach Cùram Ro-Làimh Muinntir Taobh Deas na h-Àisia cuideachd.
Aig a' choinneamh fhoirmeil ann an Seòmraichean Chathair Ghlaschu, a bhios a' tòiseachadh aig 1.45f, bidh fianais ri chluinntinn o:
· Buidheann Broilleach, Cridhe is Stròc na h-Alba agus Buidheann Cridhe Bhreatainn
· NHS Ghlaschu 's a' Chluaidh, NHS Lodainn
· Oifigearan o Riaghaltas na h-Alba agus an Dr. Barry Vallance (Neach-co-chomhairleachaidh air Eòlas-Cridhe / Prìomh Neach-Leigheis Tinneas-Cridhe aig Buidheann Tinneas Cridhe na h-Alba).
Tiogaidean don Phoball
Bidh àireamh bheag (mu 25) de thiogaidean airson suidheachan a chur air dòigh sa ghailearaidh phoblach don choinneamh ann an Seòmraichean na Cathrach. Bidh cothrom ann tiogaidean a chur mu seach seachdain ro-làimh - rach an conaltradh ri seirbheisean luchd-tadhail Pàrlamaid na h-Alba air 0131 348 5200. Bu chòir do luchd nam meadhanan a tha ag iarraidh a' chùis a fhrithealadh dol an conaltradh ri Oifis nam Meadhanan aig a' Phàrlamaid air 0131 348 5389.
Bidh luchd-obrach Seirbheisean Ruigsinn o Phàrlamaid na h-Alba cuideachd an-sàs san turas a Ghlaschu le òraidean is taisbeanaidhean do bhuidhnean coimhearsnachd is luchd-taice euslainteach aig a bheil ùidh ann an seirbheisean eòlas-cridhe - airson mion-fhiosrachaidh, bruidhinn ri Pòl Mac Anndrais air 0131 348 5357.
Figearan-cùil air seirbheisan eòlas-cridhe
A-rèir aithisg Buidheann Sgrùdaidh na h-Alba, Seirbheisean Eòlas-Cridhe, a chaidh fhoillseachadh an Gearran 2012:
· 'S e tinneas-cridhe an dàrna galar as marbhtach ann an Alba, agus aillse mar a' chiad ghalar.
· Thathar a' cosg an treas uidhir as motha air Eòlas-Cridhe am measg a h-uile raon sònraichte de leigheas - suas ri £146 millean ann an 2010/2011.
· Tha am figear seo a' riochdachadh àrdachadh 50% de na chaidh a chosg thar nan ochd bliadhna a dh'fhalbh.