30.05.2012
Chaidh atharrachaidhean a thaobh gnàth-riaghailtean Taigh an Ròid, far am bithear a' suidhe ann an Seòmar na Pàrlamaid fad trì feasgair san t-seachdain, a chur an cèill an-diugh le comataidh sa Phàrlamaid.
Tha na h-atharrachaidhean, a chaidh a thoirt seachad leis an Oifigear Riaghlaidh Tricia Marwick BPA, agus a leasachadh gu bhith mar phàirt de ghrunn cheuman ath-leasaichte le Comataidh Inbhean, Dòighean-Obrach is Cur-an-dreuchd Poblach, air an dealbh a chor’s gum bi a' Phàrlamaid nas èifeachdaiche a thaobh dèiligeadh ri ceistean a th' ann 's a thig an uachdar.
Ma thèid na ceuman is na pàtranan ùra suidhe aontachadh aig a' Phàrlamaid iomlan an ath-sheachdain (6 Ògmhios), tòisichidh a h-uile rud sa bhad an dèidh fosadh an t-samhraidh.
Agus gach mion-fhiosrachadh mu atharrachadh nan dòighean-obrach air a chur an cèill, canaidh aithisg na Comataidh gum bi na ceuman mar thaic a thaobh 's gum bi:
· seachdain-obrach phragtaigeach sa phàrlamaid ma thèid coinneamhan comataidhean a chumail sa mhadainn agus làn-sheiseanan san fheasgar;
· làn-choinneamhan air chois gach Dimàirt gus leigeil leis a' Phàrlamaid ceistean a chur ris an Riaghaltas agus gnothaichean an latha a dheasbad nas traithe san t-seachdain;
· àm ceistean an latha air a thoirt a-steach a chuireas an comas buill nam beingidhean-cùil ceistean a chur ris an Riaghaltas gun mòran rabhaidh mu dheidhinn ghnothaichean a tha cudromach gu nàiseanta;
· barrachd tìde san t-Seòmar gus ceistean a chur ri ministearan (agus, gu dearbh, tha an t-seachdain-obrach a chaidh a mholadh leis a' Bhiùro agus a tha stèidhichte air aithisg na Comataidh cuideachd a' meudachadh na tha ri fhaotainn de dh'ùine airson dheasbadan);
· amannan nas giorra eadar ceistean a bhith air an cur a-steach agus air an cur (air am faighneachd) san t-Seòmar, a chuireas an comas buill nam beingidhean-cùil barrachd cheistean a chur mu ghnothaichean nas ùire.
· deasbad a bharrachd mu ghnothaichean nam ball san t-seachdain, a' gabhail a-steach àm a choreigin san latha an dèidh Ceistean a' Phrìomh Mhinisteir, rud a mheudaicheas na tha ri fhaotainn de dh'ùine, agus de dh'inbhe, airson gnothaichean buill nam beingidhean-cùil.
Thuirt Neach-gairm na Comataidh, Dàibhidh Mac Thòmais BPA:
“Bha a' chomataidh againn riamh airson cur ri amas an Oifigeir Riaghlaidh ann a bhith a' toirt feabhas air mar a dhèiligeas sinn ris na cùisean is ùire 's ann a bhith a' cur ri comas na Pàrlamaid freagairt obann a thoirt seachad mu rudan a thig an uachdar.
“Bidh an aithisg againn, ma thèid gabhail rithe aig a' Phàrlamaid iomlan, a' cur taic ri ath-leasachaidhean bunaiteach air dòighean-obrach na Pàrlamaid, agus tha a' chomataidh againn a' cur fàilte air seo.
“Mar a bha soilleir san aithisg thùsail againn san Dùbhlachd, tha a' chomataidh a' faicinn seo mar thoiseach-tòisichidh pròiseis a bu chòir a bhith air chois fad an t-seisein seo. Tha e am beachd na comataidh againn sùil a chumail air dè cho èifeachdach 's a bhios na h-atharrachaidhean seo agus co-dhiù am biodh atharrachaidhean sam bith eile buannachdail."
Nòtaichean-cùil
Gheibhear an aithisg iomlan "Ath-Leasachadh na Pàrlamaid - Atharrachaidhean ann an Gnàth-Riaghailtean" air duilleag eadar-lìon na Comataidh:
http://www.pàrlamaidnahalba.ra/gnothaicheannapàrlamaid/ComataidheanLàithreach/29890.aspx
Anns an aithisg (td 10), thathar a' sealltainn mar a bhios seachdain ùr na Pàrlamaid mar a mholar i, le comataidhean a' tighinn an ceann a chèile gach madainn o Dhimàirt gu Diardaoin 's iad san t-Seòmar gach feasgar.
Tòisichidh gach seisean san t-Seòmar le ceistean do Mhinistearan an Riaghaltais.
Bidh Ceistean a' Phrìomh Mhinisteir ga fhàgail mar a tha e, aig 12m.l. Diardaoin.
Chaidh na h-atharrachaidhean a thaobh nan gnàth-riaghailtean a thoirt a-steach a chor is gun tèid na ceuman a chaidh ainmeachadh leis a' chomataidh air 21 Dùbhlachd 2011 a chur an gnìomh.
Thug a' Chomataidh fa-near do mhìneachadh Biùro na Pàrlamaid anns na raointean sin far nach eil e a' gabhail ri molaidhean na Comataidh mar a bha iad sa chruth thùsail. Ann a bhith a' cumail sùil air dè cho èifeachdach 's a bhios na h-atharrachaidhean seo, tha seans gum bi a' Chomataidh a' dèanamh ath-sgrùdadh air molaidhean sam bith a tha air fhàgail san àm ri teachd.