31.05.2012
Tha cuid de na pàistean as so-leònte ann an Alba fhathast air dheireadh air chàch a thaobh foghlaim, a dh'aindeoin cheuman a bhios an-sàs gus an cuideachadh, a rèir aithisg a chaidh fhoillseachadh an-diugh le Comataidh Foghlam is Cultar aig Pàrlamaid na h-Alba.
Enhanced with Microsoft Silverlight
Watch a short video interview with designer Felix Chabluk Smith Further information and related videos
Tha figearan aig Riaghaltas na h-Alba a' sealltainn gu bheil ìrean adhartais nam pàistean sin a tha fo chùram, a thaobh toraidhean an deuchainnean, glè ìseal an taca ris na th' aig pàistean eile. Fhad 's a bhios 56% den fheadhainn a dh'fhàgas sgoil a' toirt a-mach còig no barrachd theisteanasan, chan eil ach 4.7% den fheadhainn a tha fo chùram ann an àiteachan eile seach san dachaigh, agus 0.5% a tha fo chùram anns an dachaigh, a' toirt a-mach nan toraidhean ceudna.
Thuirt Neach-gairm na Comataidh, Stewart Maxwell BPA:
"Tha sinn uile mothachail air na dùbhlain a tha roimh phàistean fo chùram. On àm a ghabh sinn ar dleastanasan fhèin oirnn sa phàrlamaid, tha raon phoileasaidhean air a bhith ann a tha ag amas air na bheir a leithid seo de phàistean a-mach a thaobh am foghlaim. Mar sin, tha e soilleir gu bheil leasachadh a dhìth air an siostam a th' ann an ceartuair mar thaic do phàistean, agus tha e soilleir cuideachd gu bheil an dìth adhartais fhathast ro mhòr gabhail ris. Gu sònraichte, chaidh innse don chomataidh gu bheil mì-bhuannachdan air leth roimh na pàistean sin a tha fo chùram san dachaigh.
"Ri linn an rannsachaidh thàinig e an uachdar gum feumar cothromachadh mothachail doirbh a chur an-sàs eadar a bhith a' toirt taic do theaghlaichean san dachaigh no a' dol san eadraiginn gus pàistean a thoirt air falbh o shuidheachaidhean a dh'fhaodadh cron a dhèanamh orra. 'S e sin an adhbhar a tha sinn air aontachadh gun dèan sinn rannsachadh eile, rannsachadh nas mionaidiche, san raon seo."
A bharrachd air a dleastanas a thaobh rannsachaidh eile, rinn a' chomataidh grunn mholaidhean mionaideach gus aghaidh a chur air a' cheist imfhillte seo, nam measg:
- bu chòir beachdachadh air feumalachdan sònraichte phàistean fo chùram a rèir ro-innleachd Bliadhnaichean Tùsail Riaghaltas na h-Alba agus an ro-innleachd nàiseanta a thaobh pàrantachaidh;
- bu chòir 's gun dèanar oidhirp air feadh na dùthcha gus dèanamh cinnteach gum bi ròl nas motha aig saor-thoilich ann a bhith a' toirt taic do phàistean fo chùram, a' cur ris an obair a nì proifeiseantaich oilte;
- bu chòir 's gum bi dòigh nàiseanta clàraidh ann air na bheir pàistean fo chùram a-mach san fharsaingeachd ann am foghlam, seach a bhith a' dìreadh air toraidhean an deuchainnean; agus
- bu chòir trèanadh nas fheàrr a thoirt do luchd-cùraim proifeiseanta anns a h-uile seirbheis iomchaidh air feumalachdan àraid phàistean fo chùram.
Cùl-sgeul
'S iad pàistean fo chùram feadhainn a bhios an aona chuid a' còmhnaidh nan dachaigh fhèin fo riatanas stiùiridh, air neo a chaidh a chur le ùghdarras ionadail fo chùram chàirdean, fo altramachd neo gu ionad-còmhnaidh.
Thathar a' meas gu bheil mu thuaiream 16,000 pàiste fo chùram ann an Alba 's cha mhòr 5,500 fo chùram san dachaigh.
A' cleachdadh dòigh car ùr-ghnàthaichte san rannsachadh seo, chum a' chomataidh deasbad san t-Seòmar mus do dh'fhoillsich iad an aithisg a chor ’s gum faigheadh iad beachd is sgeul a h-uile Ball. Cuideachd, chum a' chomataidh mòr-thachartas cuide ris an fheadhainn chiad-sreath a dh'obraicheas le pàistean fo chùram, mar oidhirp air fuasgladh pragtaigeach fhaotainn do na duilgheadasan a bhios roimh phàistean fo chùram.
Cuideachd, dh'èist a' chomataidh ri fianais-bheòil bho raon farsaing bhuidhnean ri linn sheiseanan, nam measg Clann Air Thoiseach, Comann Luchd-Stiùiridh Obrach Shòisealta na h-Alba agus Riaghaltas na h-Alba.
B' iad còig prìomh chuspairean an rannsachaidh:
· Ullamhachd Ionnsachadh
· Taic san Sgoil
· Cur-an-gnìomh phoileasaidhean is laghan a th' ann
· Co-obrachadh
· Maoin.
Gheibhear làn-fhiosrachadh air rannsachadh na comataidh tron cheangal seo:
http://www.pàrlamaidnahalba.ra/gnothaicheannapàrlamaid/ComataidheanLàithreach/41975.aspx
Contact information
Media
Committees
Public information
- Telephone: 0800 092 7500
- Textphone users can contact us on 0800 092 7100
- We also welcome calls using the Text Relay service
- Text message: 07786 209888
- sp.info@scottish.parliament.uk
You can also follow us on twitter @scotparl