12.06.2012
Thig taisbeanadh a sheallas mar a chaidh daoine an-sàs ann am Pàrlamaid na h-Alba gus cùisean atharrachadh gu Taigh-cluiche Eden Court ann an Inbhir Nis an-diugh (Dimàirt, 12 Ògmhios). Air Diardaoin, cuiridh Fòram Òigridh na Gàidhealtachd, a tha stèidhichte ann an Inbhir Nis, DVD ùr air bhog gus aire dhaoine a thogail air ciorram aig an taisbeanadh.
Bidh 'Sgeulachdan Siùbhlach' a' measgachadh obair-chamara, nìthean agus stuth lèir-chlaisneach gus sgeulachd deichnear - a chaidh an-sàs ann an iomairt agus sa Phàrlamaid - a rinn diofar ann an Alba fèin-riaghailte innse.
Am measg na tha san taisbeanadh eadar-ghnìomhach tha sgeulachd Gemma Nic an Tòisich às Inbhir Nis, a tha na ball de Haggeye - pròiseact do dhaoine òga bho aois 12 gu 25 aig a bheil duilgheadasan fradhairc agus a bhios ri iomairtean gus seirbheisean, goireasan agus stuthan so-ruigsinneach fhaotainn.
Agus i a' toirt tarraing air imrich an taisbeanaidh a dh'Inbhir Nis, thuirt Oifigear Riaghlaidh na Pàrlamaid, Tricia Marwick BPA:
"Tha còrr is 200,000 neach air an taisbeanadh seo fhaicinn mu-thràth 's e a' siubhal thar na h-Alba. Tha mise glè thoilichte gu bheil e fhathast a' dol mun cuairt na dùthcha, oir tha e cudromach gum bi Pàrlamaid na h-Alba a' dèanamh ceangail ri èasgaidheachd, misneachd is amasan ar n-òigridh.
"Is iomadh dòigh san tèid daoine an-sàs sa Phàrlamaid, eadar a bhith a' togail iomairt, a' cur a-steach athchuinge neo a' conaltradh ri BPAan aig tachartas neo taisbeanadh a tha fo urras bhall, agus 's e amas 'Sgeulachdan Siùbhlach' ach cuid de na dòighean sin a chur fa chomhair dhaoine."
Fòram Òigridh na Gàidhealtachd
Bidh Fòram Òigridh na Gàidhealtachd, a bhuannaich co-fharpais 'Faigh an Dealbh!' aig Pàrlamaid na h-Alba an-uiridh, a' cur air bhog an DVD ùr aca air a bheil an tiotail 'Na Cuir Mise ann am Bogsa!' air Diardaoin 14 Ògmhios aig Taigh-cluiche Eden Court mar phàirt den taisbeanadh Sgeulachdan Siùbhlach.
Bidh an DVD agus pasgan-stuthan do luchd-teagaisg cuideachd ri fhaotainn aig bòrd an Fhòraim ann an Taigh-cluiche Eden Court mar oidhirp aire dhaoine a thogail air ciorram. Airson barrachd fiosrachaidh, bruidhinn ri Celia Baxter aig Fòram Òigridh na Gàidhealtachd air 07789 680811.
Cùl-sgeul
Fanaidh taisbeanadh Sgeulachdan Siùbhlach ann an Taigh-cluiche Eden Court gu Diluain 23 Iuchar.
'S iad an deichnear aig am bi sgeul san taisbeanadh:
Gemma Nic an Tòisich, A' Ghàidhealtachd 's na h-Eileanan, a bhios ag iomairt airson taic nas fheàrr do dhaoine ann an Alba aig a bheil trioblaid fradharc.
“Tha mise air aon eisimpleir de mhòran daoine le feumalachdan a bharrachd a chaidh a leigeil sìos le siostam an fhoghlaim. Tha mi airson an siostam atharrachadh agus mar a dhèiligear ri clann le trioblaid fradharc."
Bob Reid, Alba mu Dheas, a chuir athchuinge a-steach gus Goireasan do Mhotor-Rothairean Far-an-Rathaid a chur air chois.
“Creididh mise gu làidir gu bheil mar gum biodh iuchar ann don a h-uile òganach, as bith dè na duiligheadasan aca... thoir dhaibh dùbhlan ùr, rudeigin a thuigeas iad, rudeigin dom buin iad."
Tina NicÌomhair, A' Ghàidhealtachd 's na h-Eileanan, a chuir athchuinge post-d a-steach mu oidhirp leigheasan aillse fhaotainn air Seirbheis Nàiseanta na Slàinte.
“Chuir sinn romhainn iomairt a chur air bhonn, ged nach robh guth air an fhacal iomairt aig an àm. Sgrìobh Mìcheal litir agus sheòl mise mar phost-d i don a h-uile duine air an siostam agam 's dh'iarr mi orra a cur chun nam Ball-Pàrlamaid aca, 's mar sin b' e sin an toiseach-tòisichidh."
Walter Baxter, Taobh an Ear-thuath na h-Alba, a chuir athchuinge air dòigh gus cur an aghaidh mar a bhathar a' coimeasgadh ionadan sònraichte airson dhaoine a dh'fhulaingeas dòirteadh-fala eanchainne.
“Tha a bhith a' fulaing le tinneas-eanchainne glè dhoirbh, chan ann dhut fhèin a- mhàin ach do na daoine a tha a' toirt an aire dhut. 'S e glè bheag de chùram an dèidh làimh a th' ann do dhaoine le tinneasan eanchainne."
John Muir, Taobh a Siar na h-Alba, a chuir athchuinge a-steach gus cur an aghaidh eucoir le sgeinnean an dèidh bàs a mhic.
“Saoilidh mi gun do thuig muinntir Ghrianaig agus daoine sna ceàrnaidhean mun cuairt gur e suidheachadh mo mhic Damian rud a dh'fhaodadh tachairt dha mac no nighean aca fhèin... feumaidh rudeigin atharrachadh."
An t-Urr. Iain Dòmhnallach, A' Ghàidhealtachd 's na h-Eileanan, a tha air Àm Cnuasachaidh a stiùireadh an am Pàrlamaid na h-Alba.
“Tha daoine an seo gu mòr an-sàs san rud ris an canar coimhearsnachd, agus ann an ceistean ceartas sòisealta. 'S e chuireas fìor choimhearsnachd an cèill ach ciamar a bheirear aire do na daoine is feumaile aice."
Iain MacLeòid, Lodainn, a chuir dà athchuinge a-steach mu chùisean Gàidhlig, agus a tha gu mòr an-sàs ann an cùisean cultar is Gàidhlig ann an Dùn Èideann.
“'S e bh' air chùl na h-iomairt ach feum air inbhe shònraichte don chànan a chor’s gum bi leasachaidhean leantainneach comasach san àm ri teachd."
Amal Azzudin à Glaschu, a thog iomairt an aghaidh a bhith a' glacadh luchd-sireadh-tèarmainn sa chamhanaich leis nach do shoirbhich dìon poilitigeach fhaotainn.
“'S e a thugadh a-mach leis an iomairt aig a' char is motha ach aire a thogail... 's e sin an aon rud a b' urrainn dhuinn a dhèanamh."
Claire Ewing, Ball de Phàrlamaid Òigridh na h-Alba.
“Buinidh poilitigs ris a h-uile rud 's ris a h-uile àite, ach cha tuig an òigridh sin... ma tha rud a dhìth ort, nì thu strì air a shon... feumaidh tu creidsinn annad fhèin agus anns gach nì a tha thu ris."
Rebecca Brown, Teis-meadhain na h-Alba, a rinn greis-gnìomhachais aig oifis roinneil a BPA ionadail.
“An tuigse gum buin poilitigs ris a h-uile rud. Chan eil dol às agad... gu fìrinneach, feumaidh tu a bhith an-sàs ann, bheir e buaidh ort co-dhiù."