15.06.2012
Tillidh sàr-dhealbhan naidheachd eadar-nàiseanta gu Pàrlamaid na h-Alba san Iuchar nuair a bhios obair luchd-duaiseCo-fharpais Dealbhan Luchd-Naidheachd an t-Saoghail (Word Press Photo - WPP) ri fhaicinn sa Phrìomh Thrannsa. Cuideachd, nì an neach-camara Ilvy Njiokiktjien, aig a bheil duaisean airson a cuid obrach, òraid phoblach saor 's an asgaidh mun obair aice.
'S e Dùn Èideann ciad àite-tadhail an taisbeanaidh siubhlach seo san RA, far am bithear a' sealltainn gach saothar a bhuannaich fo na naoi cuspairean uile. Bhon dealbh a bhuannaich san fharsaingeachd anns a bheil màthair Yemeni agus burqa air h-aodann 's a mac ciùrrte na h-uchd, gu feadhainn eile mar cho-fharpaisean deireannach nam fear làidir, nighneagan-bainnse agus mathan bàn a' dìreadh creige, bidh CDLS a' cur an cèill cathan an t-saoghail, spòrs, nàdar agus beatha àbhaisteach ann an taisbeanadh làidir drùidhteach.
Thuirt Oifigear Riaghlaidh Pàrlamaid na h-Alba, Tricia Marwick BPA:
"Cuiridh taisbeanadh Luchd-Naidheachd an t-Saoghail solas air daoine 's air tachartasan air feadh na cruinne, a' glacadh, tro ìomhaighean làidir tarraingeach, mar a tha prìomh naidheachdan air buaidh a thoirt air beatha daoine san t-sreath.
"Dèiligidh tòrr dhe na h-ìomhaighean ri cogadh is còmhrag, agus cuiridh iad nar cuimhne cho fortanach 's a tha sinn ann an Alba, far a bheil deasbad an eisimeil ri briathran 's chan ann ri buill-armachd.
"Cuideachd, cuiridh an taisbeanadh an cuimhne dhuinn mar a bhios luchd-camara 's naidheachd gan cur fhèin fo chunnart gus na h-ìomhaighean seo a ghlacadh. Tha an taisbeanadh a' dìreadh air obair an neach-camara às an Fhraing, Rémi Ochlik, a bhuannaich co-fharpais nan Naidheachdan Coitcheann le sreath dhealbhan mun chath ann an Libya. Chaidh a mharbhadh na bu traithe am bliadhna nuair a bhuail bomba an togalach anns an robh e fhèin is luchd-naidheachd eile ag obair, ann an Homs an Syria."
Bidh taisbeanadh CDLS ri fhaicinn ann am Prìomh Thrannsa na Pàrlamaid o Dhiardaoin 5 Iuchar gu Disathairne 28 Iuchar, fosgailte gu h-anmoch gach Diardaoin. Tha e saor 's an asgaidh.
Òraid neach-camara a fhuair duaisean
Nì an neach-camara Ilvy Njiokiktjien, a bhuannaich duaisean airson a h-obrach, òraid phoblach saor 's an asgaidh mun obair aice aig 4.30f air Diciadain 4 Iuchar aig Pàrlamaid na h-Alba.
Bhuannaich Ilvy dà dhuais aig CDLS 2012. Fhuair i a' chiad duais anns a' cho-fharpais Aithris Cuspair tro Iomadh Meadhan le 'Afrikaner Blood', agus an dàrna duais anns a' cho-fharpais 'Cùisean Aon-fhillte an Latha-an-Diugh', cuideachd airson 'Afrikaner Blood'.
Tha am pròiseact stèidhichte air campa-trèanaidh Kommandokorps ann an Carolina an Taobh Deas Afraca a th' air a ruith le duine a ghabh 'Còirneal' air fhèin, Franz Joosie, a bha fo sheirbheis Feachdas Dìon Taobh Deas Afraca aig àm san robh an t-seann sgaradh fo rèim. Cuiridh esan air dòigh campaichean air feadh saor-laithean an t-samhraidh do dheugairean òga geala, a' teagasg dhaibh mar a dhèiligeas iad ri rud a shaoilear a bhith mar nàmhaid 'dubh'.
Cùl-sgeul
Air chois a-nis fad 55 bliadhna, 's e Co-fharpais bhliadhnail Obair-Chamara Luchd-Naidheachd an t-Saoghail a' phrìomh cho-fharpais eadar-nàiseanta dhe seòrsa, a' cur an cèill ìre feabhais a dh'fheumar a ruigsinn. Thèid a breithneachadh aig oifis Obair-Chamara Luchd-Naidheachd an t-Saoghail sna Tìrean Ìseal.
Tarraingidh a' cho-fharpais iarrtasan o luchd-camara proifeiseanta, luchd-naidheachd a ghabhas dealbhan agus iadsan a nì dealbhan airson phrògraman aithriseach bho air feadh an t-saoghail, le 5,247 neach-camara às 124 dùthchannan a' gabhail pàirt am bliadhna, le 101,254 dealbhan a chaidh a chur a-steach ron latha crìochnachaidh ann am meadhan an Fhaoillich.
Thug am pannal-breithneachaidh duaisean fo naoi cuspairean do 57 neach-camara às 24 dùthchannan: Afganastàn, Argantìn, Astràlia, Bòsnia agus Herzegovina, Canada, An t-Sìn, An Danmhairg, An Fhraing, A' Ghearmailt, Na h-Innsean, Iràn, Èire, An Eadailt, Seapàn, Meicseago, Na Tìrean Ìseal, Nirrbhidh, An Ruis, Afraga a Deas, An Spàinn, An t-Suain, An Rìoghachd Aonaichte agus Na Stàitean Aonaichte.
Agus mu 100 taisbeanadh ionadail air dòigh gach bliadhna, 's e turas agus taisbeanadh WPP as measaile air feadh an t-saoghail.