20.06.2012
Bidh mar a chaidh dèiligeadh le Galair Legionnaires ann an Dùn Èideann a' tighinn fo sgrùdadh ri linn seisean fianais aig a' Chomataidh Slàinte 's Spòrs aig coinneamh air 26 Ògmhios.
Thuirt Neach-gairm na Comataidh Slàinte 's Spòrs, Donnachadh MacNèill BPA:
"'S e briseadh a-mach cianail den Ghalair Legionnaires a bha seo. Tha e coltach gu bheil lìon nan daoine a ghlac e ion 's a' sgur a-nis. Uime sin 's e seo an t-àm iomchaidh do bhuill sgioba stiùiridh an tachartais ceistean a fhreagairt mu mar a chaidh dèiligeadh ris agus mu adhartas sam bith a rinneadh a thaobh cò às a bhris an galair a-mach ainmeachadh.
"Chaochail dithis mar bhuil air a' ghalair seo, rud cianail. Feumaidh sinn, far an gabh a dhèanamh, leasanan ionnsachadh on chùis seo, rud a bhios mar phàirt cudromach de cheasnachadh na Comataidh."
Tha a' Chomataidh Slàinte 's Spòrs air iarraidh air Sgioba Stiùiridh an Tachartais nochdadh ron Chomataidh. Am measg an luchd-fianais, bidh:
· A' Bh.Ph. Pam Waldron, Stiùiriche Roinn-Ghnìomha Slàinte is Sàbhailteachd na h-Alba – agus Ceannaire Buidheann-Stiùiridh Gnìomhachd, Roinn na h-Alba 's Sasainn a Tuath;
· Dr Alison NicCaluim, Stiùiriche Slàinte a' Phobail is Poileasaidh Slàinte, NHS Lodainn, agus Dr Donnachadh MacCarmaig, Comhairliche Slàinte a' Phobail, NHS Lodainn;
· Cailean Sibbald, Stiùiriche Slàinte 's Sàbhailteachd Bìdh, Comhairle Chathrach Dhùn Èideann:
· Dr Seumas MacMeanamain, Comhairliche Ghalairean Gabhaltach, Sgioba Analachd, Dìon Slàinte na h-Alba
Thuirt an Leas-neach-gairm, Bob Doris BPA:
“Bha a' Chomataidh gu mòr airson leigeil leotha sin a bha a' dèiligeadh ris a' bhriseadh a-mach seo dol ris an obair aca agus làn-aire a chumail air a bhith a' dèiligeadh ris a' cheist chudromach seo a bhuineas ri slàinte a' phobail.
“Agus an galair a-nis fo smachd, tha a' Chomataidh toilichte gu bheil sgioba stiùiridh an tachartais deònach nochdadh ro na BPAan. Leigidh an t-seisean-fianais leis a' Chomataidh Slàinte ròl feumail a bhith aca ann a bhith a' sgrùdadh mar a bhris an galair a-mach. Chan e gu bheil sinn a' cur teagamh ann an gnìomh sònraichte sam bith, ach a' cuideachadh a thaobh leasachadh leantainneach a chur air adhart air mar a bhithear a' stiùireadh a leithid seo de shuidheachadh.”
Fios conaltraidh
Meadhanan
Comataidhean
Faodar a' Chomataidh a leantainn air Twitter @SP_HealthSport