22.06.2012
Rud nach do thachair riamh roimhe, bidh Comataidh Foghlaim is Cultar a' comharrachadh deireadh ciad bliadhna seo na Pàrlamaid le bhith a' faighinn 'aithris adhartais' fìor-mhionaideach o Rùnaire a' Chaibineit airson Cultar is Cùisean Taobh-a-Muigh.
Thuirt Neach-gairm na Comataidh, Stiùbhart Maxwell BPA:
"Thar nam mìosan a dh'fhalbh, tha ar comataidh air fianais fhaotainn o ghrunn eòlaichean air na prìomh chuspairean a bheir buaidh air foghlam is cothroman-beatha pàistean is daoine òga na h-Alba san latha a th' ann. Fhuair sinn fianais air ceistean mar taic a bharrachd airson ionnsachaidh, bliadhnaichean tùsail, na ghabhas toirt a-mach agus, thoir fa-near, curraicealam airson sàr-mhathas.
"Le bhith a' toirt cuireadh do Rùnaire a' Chaibineit freagairt a thoir dhuinn mun tig fosadh an t-samhraidh, tha sinn a' cur an cèill ceistean a tha glè chudromach do chloinn, do phàrantan agus do phroifeiseantaich-foghlaim thar na dùthcha. 'S e seo cothrom freagairtean fhaotainn sa bhad do na ceistean a thog luchd-fianais, agus ar comataidh, ri linn nan seiseanan-fianais againn."
Cùl-sgeul
Èistidh a' chomataidh ri fianais-bheòil o Mhìchael Ruiseil, Rùnaire a' Chaibineit airson Cultair is Cùisean Taobh-a-Muigh, air Dimàirt 26 Ògmhios.
Tha a' chomataidh air seiseanan-fianais sònraichte a chumail air na cuspairean a leanas:
· Bliadhnaichean Tùsail
· Taic a bharrachd airson Ionnsachaidh
· Toirt a-mach
· Solarachadh seirbheisean chloinne leis an treas earrann/an earrann shaor-thoileach air sgàth ùghdarrasan ionadaile is buidhnean phoblach eile
· Togalaichean Sgoile
· Curraicealam airson sàr-mhathas
Thug raon farsaing de luchd-fianais fiosrachadh seachad, nam measg Comann Luchd-Stiùiridh Foghlaim na h-Alba, Fòram Nàiseanta Pàrantan na h-Alba, acadaimigich agus a’ bhuidheann-charthannais CUR AN COMAS na h-Alba.
'S iad cuid de na ceistean a thogadh ri linn nan seiseanan: ullachadh àrd-sgoiltean gus an curraicealaim airson sàr-mhathas a chur an gnìomh; mar a ghabhas ìre na bheirear a-mach ann an sgoiltean na h-Alba a leasachadh; cho eadar-dhealaichte is a tha an taic thar na dùthcha do chloinn air a bheil taic a bharrachd a dhìth; agus cosgaisean a thaobh oighreachd-sgoile na h-Alba a leasachadh.