10.12.2012
Am bacadh caoch, pàigheadh neo-ionann agus cothrom air cùram-cloinne. Seo ceistean a chuireas srian ri comas bhoireannach dol an sàs anns an àite-obrach. Tha Comataidh Co-ionannachd Chothroman air gairm airson fianaise a chur a-mach an-diugh gus sealltainn air fuasglaidhean air an neo-ionannachd seo
Thuirt Neach-gairm Chomataidh Co-ionannachd Chothroman Màiri Nic a’ Phì BPA:
“Tha mar a tha gnothaichean eaconamach an-dràsta air droch bhuaidh a thoirt air caochladh raointean, nam measg ìrean cion-cosnaidh a’ sìor dhol am meud, a’ bualadh air boireannaich gu sònraichte.
“Tha rannsachadh na Comataidh air na ceistean a tha mar bhacadh air com-pàirteachas làn le boireannaich ann an obair a shònrachadh mar-thà. Nam measg seo tha a’ bhuaidh a bheir am bacadh caoch, boireannaich gan dealachadh ann an seòrsaichean àraid de dh’obair far a bheil pàigheadh is inbhe ìseal, agus gun chothrom air cùram-cloinne.
“Tha sinn uile ag iarraidh co-ionannachd am measg an luchd-obrach. Tha a’ Chomataidh seo a’ feuchainn ris na ceuman a tha dhìth gus sin fhaighinn a shònrachadh.”
Bu mhath leis an rannsachadh, a tha air gairm airson fianaise a chur a-mach an-diugh, beachdan a chluinntinn air fuasglaidhean a dh’fhaodadh a bhith ann air caochladh cheistean a thog a' Chomataidh mar-thà.
Nam measg tha:
· Ceistean a thaobh luchd-obrach – leithid obair-sioftaidh agus a’ bhuaidh a bheir i; cion obair phàirt-thìde ann an cuid de roinnean agus, ann am farsaingeachd, am meudachadh air àireamh nam fireannach ri obair phàirt-thìde; freagairt an luchd-fhastaidh air iarrtas airson a bhith ag obair gu sùbailte; a’ bhuaidh a bheir gearraidhean air pàigheadh anns na roinnean poblach is saor-thoileach; am mì-leas dùbailte a thig air boireannaich air a bheil ciorram a’ cur ann an margadh a’ chosnaidh.
· Dealachadh ann an obair – leithid boireannaich gan dòmhlachadh ann an seòrsaichean sònraichte de dh’obair – leithid cùram, glanadh agus obair-chlèireachais; boireannaich ri obair phàirt-thìde far a bheil pàigheadh is inbhe ìseal mar thoradh air dleastanasan-cùraim no fo-chosnadh; a’ bhuaidh a bheir am bacadh caoch agus am buin e ri barrachd bhoireannach air bùird-stiùiridh no adhartas ann an dreuchd.
· Cùram-cloinne – mar am feum air cùram-cloinne pailt is sùbailte gus feumalachdan obraichean-sioftaidh a thoirt a-mach; am feum gum bi cùram-cloinne an-asgaidh aig an ionad-lìbhrigidh; am feum air gu leòr de luchd-obrach.
· Boireannaich ann an gnìomhachas – am feum a tha ann taic a chur ri boireannaich ann an gnìomhachas gus cuideachadh riutha an cuid iomairtean fhèin a thòiseachadh, a chumail suas agus a chinntinn.
· Rian air pàigheadh neo-ionann ann an ùghdarrasan ionadail – mar a nithear cinnteach gun coilean ùghdarrasan ionadail dleastanasan mu phàigheadh co-ionann.
Cùl-fhiosrachadh
Thòisich Comataidh Co-ionannachd Chothroman an rannsachadh aice sa Ghearran agus tha e air:
- Seisean cruinn a chumail ann an Seachdain nan Aonaidhean-ciùird a chumail (Gearran 2012)
- Dol an ceannas air an deasbad anns a’ Phàrlamaid air Boireannaich agus Obair (Ògmhios 2012)
- Cruinneachadh Riaghaltas na h-Alba air boireannaich is cosnadh a fhrithealadh is a leantainn (Sultain 2012)
- Dreuchd Buidseat 2013-14 a sgrùdadh a thaobh gnè (Dàmhair/Samhain 2012)
Fios conaltraidh
Meadhanan
Fios Comataidh
You can also follow the Committee on Twitter @SP_EqualOpps
Fiosrachadh a' Phobaill
Lean air twitter sinn @ParlAlba