11.12.2012
Am bi cothrom air obair agus trèanadh a thaobh dhreuchdan ann an da-rìribh a’ brosnachadh phrìosanach gus stad a bhith ri eucoir san ùine fhada? ’S e sin an dearbh cheist a tha Comataidh a’ Cheartais a’ cur anns an rannsachadh aice a chaidh a chur air bhog an-diugh.
Chaidh a’ cheist a thogail o chionn ghoirid ann an aithisg 2011-12 le Ceann-sgrùdaidh Prìosanan A Mòrachd, am Brigadeir Ùisdean Rothach, far an deach a chur an cèill gun robh prìosanaich a bha gun chothrom air cur-seachadan le adhbhar dìreach ‘gan cumail ann am batharnach’ - gan stòradh.
Gabhaidh rannsachadh Chomataidh a’ Cheartais beachd mar sin air ‘ceistean mun chothrom a bhios aig prìosanaich dol an sàs ann an cur-seachadan le adhbhar ri linn dhaibh a bhith sa phrìosan.’
Thuirt Neach-gairm na Comataidh, Caristìona Ghreumach BPA:
“Tha e a’ cosg mu £32,000 sa bhliadhna, airson gach àite ann am prìosan, mar sin tha feum follaiseach ann eucoir às ùr a lùghdachadh air sgàth tèarainteachd choimhearsnachdan, sporan a’ phobaill agus nam prìosanach iad fhèin.
“Nan robh ceud prìosanach ann nach dèanadh eucoir a-rithist is nach tilleadh dhan phrìosan, bhiodh sin a’ caomhnadh mu £3.2 millean sa bhliadhna. Tha sinn ag iarraidh faighinn a-mach an tig ann an da-rìribh mar thoradh air obair, trèanadh a thaobh dhreuchdan agus foghlam cuideachadh ri prìosanaich gus an t-eòlas is a’ mhisneachd a tha a dhìth a thogail gus cosnadh fhaighinn agus sgur a bhith ri eucoir.
“Tha Comataidh a’ Cheartais den bheachd ma-thà gu bheil e deatamach fhèin gun seall sinn ris na buannachdan ceangailte ri ‘cur-seachadan le adhbhar’ ann am prìosanan na h-Alba. Cuideachd, tha sinn ag iarraidh sealltainn a bheil ‘cur-seachadan le adhbhar’ air an aon rèir sna prìosanan gu lèir agus ionnsachadh bhon chleachdas as fheàrr far a bheil a leithid ann.”
Tha gairm airson fianaise ga foillseachadh an-diugh mar phàirt de chur-air-bhog an rannsachaidh agus i ag iarraidh air a’ phoball a bharrachd air luchd-pàirteachaidh mar na buidhnean is carthannais iomchaidh ri prìosanaich is eucoir cho math ri Seirbheis Prìosanan na h-Alba agus Ceann-sgrùdaidh Prìosanan A Mòrachd ann an Alba, freagairt a thoirt air na leanas:
* Dè thathar a’ ciallachadh le cur-seachadan le adhbhar agus ciamar a ghabhas seo tomhas;
* An ìre dham bi cothrom aig prìosanaich dol an sàs ann an cur-seachadan le adhbhar;
* Dè na buannachdan a thathar a’ faicinn an lùib chur-seachadan le adhbhar agus a bheil eisimpleirean ann den chleachdadh as fheàrr;
* Dè na cnapan-starra a dh’fhaodadh a bhith ann a chuireas bacadh air prìosanaich dol an sàs nan leithid de chur-seachadan;
* A bheil cothrom air cur-seachadan le adhbharan air an aon rèir sna prìosanan gu lèir;
* An gabh cothrom air an leithid de chur-seachadan leasachadh.
Cùl-fhiosrachadh
Mhìnich aithisg bhliadhnail a’ Bhrigadeir Ùisdean Rothach, Ceann-sgrùdaidh Prìosanan A Mòrachd ann an Alba, 2011-12, cur-seachadan le adhbhar mar ‘cur-seachad sam bith a bhios, anns an latha-obrach, a’ brosnachadh leasachadh. Ghabhadh seo a-steach obair, trèanadh a thaobh dhreuchdan, foghlam is clàran gus aghaidh a thoirt air giùlan eucoireach (leithid tràilleachd), cothrom air foghlam corporra agus tadhal.”
“B’ e a’ chosgais chuibheasach a bha ann airson gach prìosanaich ann an 2010-11 £32,146.” - (làrach-lìn Seirbheis Prìosanan na h-Alba).
Contact information
Meadhannan
Comataidh
Fiosrachadh a' Phobaill
Lean air twitter sin @ParlAlba agus lean ar blog parlamaidalba.wordpress.com