Comataidh air rannsachadh mu theagasg chànanan sna bun-sgoiltean a chur air bhog

14.12.2012

Chaidh rannsachadh mu theagasg chànanan sna bun-sgoiltean a chur air bhog an-diugh (Dihaoine 14 Dùbhlachd) le Comataidh Eòrpach agus Cheanglaichean A-muigh.

 

Na bu thràithe am-bliadhna, mhol an Riaghaltas gum bu chòir gun ionnsaicheadh clann dara cànan bho Bhliadhna 1 sa bhun-sgoil agus gum bu chòir tòiseachadh air treas cànan ionnsachadh ann am Bliadhna 5 air a’ char as anmoiche. Chuir a’ Chomataidh roimhpe sealltainn air an amas seo a thaobh cànain, a’ chomas a tha sa chlàr-oideachaidh air a shon agus an air an àite a tha aig cànan mar thaic ris an eaconamaidh.

 

Gus an rannsachadh a thòiseachadh le eòlas ‘air an talamh’, tadhlaidh buill den Chomataidh air Bun-sgoil Dhail Mheàrnaig ann an Glaschu an-diugh gus coinneachadh ri luchd-teagaisg; sealltainn air teagasg ga dhèanamh (clas ann am Bliadhna 7 ag ionnsachadh Eadailtis, Bliadhna 6 ag ionnsachadh Fraingise agus Bliadhna 2 ag ionnsachadh Spàinnise; agus cabadaich ri pàrantan is clann.

 

A’ bruidhinn ron turas, thuirt an Neach-gairm Cairistìona NicEalbhaidh:

 

“Tha tuigsinn cànain eile na sgil cho cudromach agus tha rannsachadh a’ dearbhadh gur h-e e an t-ionnsachadh òg an t-ionnsachadh bòidheach.  Tha rùn an Riaghaltais anns an t-seagh seo air fàilte fhaighinn bhon Chomataidh uime sin.

 

“Is e an obair a tha againn mar Chomataidh aig Pàrlamaid na h-Alba sealltainn feuch a bheil sinn den bheachd gun toir na molaidhean an t-amas a-mach taic dhearbhach a chur ri clann na bun-sgoile gus dà chànan a bharrachd ionnsachadh. Agus, gu cudromach, a bheil na goireasan agus an comas ann gus cuideachadh gus seo a lìbhrigeadh.

 

“Cuidichidh a’ chuairt a chuireas sinn ann am Bun-sgoil Dhail Mheàrnaig sinn gus rudan fhaicinn air an talamh, a’ cluinntinn bhon chloinn fhèin, bho na pàrantan agus bhon luchd-teagaisg mu na beachdan aca air seo. Chan eil ann an-diugh ach a’ chiad chuairt ann an sreath dhiubh air feadh na h-Alba. Tha togail air a’ Chomataidh againn ri bhith ag èisteachd barrachd bho dhaoine mun dòigh as fheàrr gus na daoine òga againn ullachadh airson na tha romhpa san t-saoghal-mhòr.

 

Còmhla ri Cairistìona NicEalbhaidh BPA air a’ chuairt seo bidh an Leas-Neach-gairm Hanzala Malik BPA. Is e an ath chuairt a bhios ann gu Sgoil Ealasaid, Eddlewood, faisg air Hamaltan (tè de na sgoiltean-deuchainn aig Riaghaltas na h-Alba far a bheil Spàinnis ga teagasg) Dihaoine 25 Faoilleach 2013. Thèid barrachd fiosrachaidh mu chuairtean eile fhoillseachadh ri tìde.

 

 

Cùl-fhiosrachadh

 

Thèid cur-air-bhog an rannsachaidh madainn Dihaoine aig Bun-sgoil Dhail Mheàrnaig (111 Sràid Baltic, Baile na Drochaid, Glaschu, G40 3BA0).

Bheir dealbhadair Pàrlamaid na h-Alba Andrew Cowan dealbhan seachad air iarrtas cuideachd. Bidh aonad-craolaidh Pàrlamaid na h-Alba an làthair agus faodaidh iad clàradh-bhideo/èisteachd a thoirt seachad ma thèid iarraidh ro làimh.

Tha e san amharc aig Riaghaltas na h-Alba cur air chomas do dhaoine òga uile dà chànan ionnsachadh (cho math ri cànan glùin na màthar aca) fhad is a tha iad anns a’ bhun-sgoil. Tha seo a’ leantainn molaidhean aithisg Buidheann-obrach Chànanan Riaghaltas na h-Alba, ‘Ionnsachadh Chànanan ann an Alba Mhol a’ Bhuidheann-obrach gum bu chòir gun ionnsaicheadh clann dara cànan bho Bhliadhna 1 sa bhun-sgoil agus gum bu chòir tòiseachadh air treas cànan ionnsachadh ann am Bliadhna 5 air a’ char as anmoiche.  

Chaidh deasbad-seòmair aig Riaghaltas na h-Alba a chumail sa Phàrlamaid air 24 Cèitean 2012 nuair a chaidh taic ris a’ bheachd a chlàradh ged a chaidh dragh a chur an cèill mu bhacaidhean a dh’fhaodadh a bhith ann, ceistean nam measg air goireasan, cion-eòlais agus beachdan cultarail.

Am measg nan ceistean air an dèan rannsachadh na Comataidh sgrùdadh tha, maoineachadh (cleachdadh maoineachadh an AE san àireamh); na tha ann de dh’eòlas is de ghoireasan gus cànanan a theagasg; an comas anns a’ chlàr-oideachaidh gabhail ri barrachd ionnsachadh-chànanan; roghainn nan cànanan rin teagasg; agus an t-àite aig cànan ann an leasachadh eaconamach.