A’ bhuaidh aig ath-leasachadh shochairean gu bhith air a cluinntinn ann an Glaschu

18.04.2013

Thèid a’ bhuaidh aig ath-leasachadh shochairean air beatha dhaoine a dheasbad ann an Glaschu nuair a choinnicheas Comataidh Ath-leasachadh Shochairean Pàrlamaid na h-Alba ann an Talla a’ Bhaile an ath sheachdain (Dimàirt 23 Giblean).

Tha seo a’ tighinn an dèidh rannsachaidh a chaidh fhoillseachadh leis a’ Chomataidh an t-seachdain a chaidh (Diardaoin 11 Giblean) gum bi a' bhuaidh as motha ann an Glaschu, a’ call co-ionann ri £650 sa bhliadhna do gach inbheach aig aois a’ chosnaidh nuair a thèid an t-ath-leasachadh a thoirt gu buil gu h-iomlan.

 

Chaidh a’ choinneamh a chur air dòigh leis a’ Chomataidh ann an com-pàirteachas le Poverty Alliance, agus thèid a cumail ann an seòmar a’ chiùil, Talla a’ Bhaile, Glaschu 23 Giblean bho 9.30m gu meadhan-latha.

 

Thuirt Neach-gairm na Comataidh Mìcheal Ó Mathúna (McMahon) BPA:

 

“Thairis air a’ bhliadhna a tha air a dhol seachad, tha sinn air a bhith ag iarraidh air daoine ann an Alba air am bi ath-leasachadh air sochairean a’ bualadh innse dhuinn mu na dh’fhiosraich iad, mun dòchas a tha aca agus mun eagal a tha orra. Tha sinn air dà sheisean-fianaise a chumail aig Taigh an Ròid mar-thà a bha an dà chuid drùidhteach agus nam fosgladh-sùla.  

 

“Tha cliù air muinntir Ghlaschu a bhith lom nan cuid cainnte agus chan eil mi an dùil gum bi an luchd-fianaise diùid nuair a bhios sinn ag iarraidh cluinntinn bhuapa.  Tha e cudromach gum bi fios air na tha a’ tachairt aig baile. Seach Iain Donnchadh Mac a’ Ghobhainn, tha sinn ag èisteachd agus bheir sinn cluas-ri-èisteachd dha na beachdan aca.  Tha e cudromach dhuinn gun obraich sinn a-mach dè dhèanamaid air dòigh eile ann an Alba gus a’ bhuaidh air an fheadhainn as so-leònte a lùghdachadh.”

 

Am measg an luchd-fianaise aig a’ choinneimh, tha:

·         Daoine air an comharrachadh agus ag obair le Poverty Alliance.  

·         Buill den a’ bhuidhinn Glasgow's Stronger Together, buidheann daoine air a bheil ciorram a thaobh ionnsachaidh a bhios a’ coinneachadh is a’ bruidhinn mu chuid de na h-atharrachaidhean poilitigeach anns a bheil ùidh aca.

·         Daoine a thug freagairt air tagradh ‘Your Say’ na Comataidh.

 

Tha a’ choinneamh a’ tighinn an dèidh an rannsachaidh, a chaidh a ghabhail os làimh leis an Ionad airson Rannsachaidh Eaconamaich is Shòisealta Roinneil aig Oilthigh Hallam Sheffield, air a mheas, nuair a thèid a thoirt gu buil gu h-iomlan, gun toir an t-ath-leasachadh air sochairean barrachd is £1.6 billean air falbh bho eaconamaidh na h-Alba gach bliadhna. Tha seo co-ionann ri mu £480 sa bhliadhna do gach inbheach aig aois a’ chosnaidh ann an Alba. Ann an Glaschu, tha seo ag àrdachadh gu £650 an comhair na bliadhna. Ged a tha cuibheas na h-Alba aig car an aon ìre ri cuibheas Bhreatainn, tha seo a' fàgail Ghlaschu san dara h-àite an dèidh Bhirmingham a-mhàin ann am Breatainn a thaobh call-ionmhais. 

 

Thuirt Leas-neach-gairm na Comataidh Jamie Hepburn BPA:

 

“Nochd ar cuid rannsachaidh a’ bhuaidh sgriosail a bheir an t-ath-leasachadh seo air Glaschu. Tha a bhith a’ faicinn na h-ìre cudromach ach chan ann dìreach air àireamhan a tha an t-ath-leasachadh seo a’ bualadh.  Is ann air daoine a tha e a’ bualadh – na caraidean, an teaghlach agus na nàbaidhean againn.  Tha an iomairt ‘Your Say’ againn air a bhith deatamach gus daoine a chuideachadh gus na h-aodannan air chùl nan àireamhan fhaicinn agus saoilidh mi gum faic an fheadhainn a bhios a’ tighinn dhan choinneimh againn ann an Glaschu seo gu math soilleir.”

 

Thuirt Peadar Ó Ceallaigh, Stiùiriche Poverty Alliance:

 

“A rèir mar a chaidh an deasbad mu atharrachaidhean air sochair an dèinead o chionn beagan sheachdainean, chunnaic sinn oidhirpean le cuid cur sìos air an fheadhainn a bhios a’ cleachdadh siostam na tèarainteachd sòisealta againn. Mar thoradh air seo, is ann a tha tachartas ‘Your Say’ ann an Glaschu nas cudromaiche buileach.  Is e cothrom a tha ann an fhìrinn a nochdadh mu na tha a bhith beò air sochairean a’ ciallachadh agus a’ bhuaidh dha-rìribh a bhios na h-atharrachaidhean a’ toirt a thuigsinn.  Ma tha sinn gus fuasgladh dha-rìribh fhaighinn san ùine fhada air na dùbhlain a thig air siostam nan sochairean againn, tha e deatamach an uair sin gun toir sinn cluas-ri-èisteachd dhan fheadhainn a chleachdas an siostam.”

 

Cùl-fhiosrachadh

Faodaidh daoine frithealadh air a’ choinneimh agus tiogaidean a chur an dara taobh. Gus tiogaid a chur an dara taobh, cuiribh post-dealain gu sp.bookings@scottish.parliament.uk no sgairt air 0131 348 5200 no fòn-an-asgaidh 0800 092 7600 (luchd-cleachdaidh Textphone: 0800 092 7100).