22.04.2013
Tha na bacaidhean air toirt ionnsaigh air dubh-shaothrachadh gnèitheach air cloinn gu bhith air an sgrùdadh le Comataidh nan Athchuingean Poblach aig Pàrlamaid na h-Alba.
Tha a’ Chomataidh a’ cumail oirre leis an sgrùdadh aice air cho èifeachdach agus a tha an stiùireadh is an cleachdadh a tha ann an-dràsta gus aghaidh is stad a chur air dubh-shaothrachadh gnèitheach (sexual explotation) air cloinn. Tha a’ Chomataidh ag iarraidh cluinntinn a-nis bho na buidhnean ud a tha ag obair gus aghaidh a thoirt air a’ cheist chudromaich seo gus an tuig i na duilgheadasan a tha ann a thaobh sònrachadh, briseadh-suas is tagradh na a tha ri dubh-saothrachadh gnèitheach air cloinn.
Thuirt Neach-gairm na Comataidh Dàibhidh Stiùbhart BPA:
“Tha na mìltean de dhaoine air feadh na h-Alba a bhios ag obair gun stad gus aghaidh a thoirt air dubh-shaothrachadh gnèitheach air cloinn agus taic a chur ri fulaingichean.
“Tha sinn ag iarraidh cluinntinn bho na h-eòlaichean mu na bacaidhean a thig orra gach latha agus na dh’fheumar dèanamh gus aghaidh is stad a chur air an obair nàr seo air cloinn air feadh na h-Alba, a' gabhail a-steach a’ cheist a’ tighinn am bàrr mu dhroch-dhìol air an Lìon / sna meadhanan sòisealta.”
Am measg nan ceistean mòra a tha a’ chomataidh ag iarraidh cur, tha:
· Dè na bacaidhean a tha ann air sònrachadh, briseadh-suas no tagradh na tha ri dubh-shaothrachadh gnèitheach air cloinn? Ciamar a ghabhadh iad seo sàrachadh?
· Dè na duilgheadasan a tha ann mu chumail clann ann an cùram agus daoine òga (ann an àiteachan-fuirich no aig an dachaigh) sàbhailte bho na dubh-shaothraichean seo?
· Dè na bacaidhean a tha ann ri cur an aghaidh nan dubh-shaothraichean a bhith a’ cleachdadh mheadhanan air an Lìon / mheadhanan sòisealta agus ciamar a ghabhadh iad seo sàrachadh?
· Dè an seòrsa trèanaidh a thathar a’ toirt seachad no a tha a dhìth gus dubh-shaothraichean a shònrachadh, a bhriseadh-suas no a thagradh?
· Dè na h-eisimpleirean de dheagh-chleachdadh a tha ann a dh’fhaodar sònrachadh mar dhòigh gus aghaidh a thoirt air an duilgheadas.
Cùl-fhiosrachadh
Chuir a’ Chomataidh an rannsachadh aice mu cho èifeachdach agus a tha an cleachdadh is an stiùireadh a tha ann an-dràsta gus aghaidh is stad a chur air droch-shaothrachadh gnèitheach air cloinn air bhog sa Mhàrt 2013.
Is e an raon-ùghdarrais aig an rannsachadh ùr sgrùdadh a dhèanamh air seòrsa agus ìre dubh-bhrath gnèitheasach air clann ann an Alba; ann an co-bhonn ri buidhnean-gnìomha is luchd-pàirteachais obrachadh a-mach dè na cuspairean as moth air an fheumar aghaidh a chur; èifeachdalachd nan ceuman a tha ann an-dràsta aig a bheil mar amas ionnsaigh a thoirt agus stad a chur air dubh-bhrath gnèitheasach air clann a sgrùdadh; agus molaidhean a dhèanamh mu na dh’fheumar dèanamh gus èifeachdalachd nan ceuman sin a leasachadh.
Chaidh an rannsachadh a chur air bhog an dèidh athchuinge (PE1393) le Barnardo’s a tha ag iarraidh air a’ Phàrlamaid:
Coiteachadh air Riaghaltas na h-Alba (1) rannsachadh ùr mu sheòrsa agus mu ìre dubh-bhrath gnèitheasach air clann ann an Alba iarraidh; (2) aithisg a thoirt air ais mu na puingean-gnìomha gu lèir anns an stiùireadh bho Riaghaltas na h-Alba ann an 2003 air Dubh-bhrath Gnèitheasach tro Strìopachas air Clann Sho-leònte agus Daoine Òga; (3) stiùireadh Riaghaltas na h-Alba air dubh-bhrath gnèitheasach air Alba ath-bhreithneachadh agus a leasachadh, a dh’ùraicheas stiùireadh Albannach 2003 agus a chuireas a-steach na mìrean buntainneach de Stiùireadh Nàiseanta Dìon-cloinne 2010.
Is e an ceann-latha mu dheireadh a tha ann gus beachdan a chur a-steach 31 Cèitean 2013.
Gheibhear barrachd fiosrachaidh mu rannsachadh na Comataidh aig;
http://www.scottish.parliament.uk/parliamentarybusiness/CurrentCommittees/62349.aspx
Fios conaltraidh
Fios do na meadhanan
Fios mun chomataidh
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: