24.04.2013
Thathar air cuireadh a thoirt do dhaoine, do choimhearsnachdan agus do bhuidhnean bho na Crìochan gu Cataibh na beachdan aca a nochdadh gu Comataidh a’ Cheartais an-diugh air a’ bhuaidh ionadail a bheir an t-ath-leasachadh air Seirbheisean Chùirtean na h-Alba (SCA) a thathar a’ moladh.
Ann an gairm airson fianais a chaidh fhoillseachadh an-diugh, tha Comataidh a’ Cheartais ag iarraidh beachdan air molaidhean SCA mun ath-chruthachadh a tha san amharc air seirbheisean nan cùirtean ann an Alba.
Am measg nam molaidhean, tha gun tèid deich de chùirtean-siorraidh agus seachd de chùirtean nam maor-ceartais a dhùnadh. Am measg nan cùirtean-siorraidh, tha: An Dùn, Baile Adainn, Baile Bhòid, Cille Chuithbeirt, Cùbar, Dòrnach, Inbhir Pheofharain, Na Pùballan, Obar Bhrothaig agus Sròn na h-Abhainne. Cuideachd ri dhùnadh tha cùirtean nam maor-ceartais ann an Anainn, Comar nan Allt, Inbhir Ùige, Irbhinn, Steòrnabhagh, Tobar na Màthar agus ann am Port Rìgh.
Thuirt Neach-gairm Chomataidh a’ Cheartais, Cairistìona Ghreumach BPA:
“Tha e deatamach gum faigh sinn an dealbh slàn a thaobh mar a bheireadh na molaidhean seo bho Sheirbheisean Chùirtean na h-Alba buaidh air a h-uile nì bho luchd-cleachdaidh nan cùirtean gu ullachadh sheirbheisean laghail agus cothrom air ceartas.
“Tha a’ ghairm airson fianais againn ag iarraidh daoine sna coimhearsnachdan fo bhuaidh gu dìreach leis na dùnaidhean a thathar a’ moladh air feadh na h-Alba agus mar a tha iad a’ faireachdainn mu na h-atharrachaidhean. A bheil iad a’ faireachdainn gum faodadh a bhith a’ siubhal nas fhaide gu cùirt an t-siorraidh mar neach-fianaise buaidh a thoirt air a’ chothrom a bhios aca air ceartas? No a bheil iad a’ faireachdainn gun toir an t-ath-leasachadh seirbheis shònraichte nas fheàrr ann an raon sònraichte don luchd-chleachdaidh? Tha sinn a’ cluinntinn cuideachd bho shiorraidhean ionadail gur h-e an smachd-bhann as motha a dh'fhaodainn a bhith ann don phartaidh chiontach am bagairt gun tèid an ainmeachadh sna pàipearan ionadail a bhios a’ gabhail gnothaich ris na cùirtean – ciamar a bheireadh na molaidhean buaidh air a’ bhacadh an lùib naidheachdan ionadail ma-thà?”
Cùl-fhiosrachadh
Chaidh co-chomhairleachadh mu mholaidhean SCA air cruth nan cùirtean san ùine air thoiseach a ghabhail os làimh aig deireadh 2012. Dh’fhoillsich SCA an aithisg is na molaidhean aice “Shaping Scotland’s Court Services” air 9 Giblean 2013 an dèidh beachd a ghabhail air freagairtean air a’ cho-chomhairleachadh.
Dh’aontaich Comataidh a’ Cheartais beachdachadh a dhèanamh agus gabhail ri fianais mu na molaidhean air fad anns an aithisg aig a’ choinneimh aice air 16 Giblean. Tha i air aontachadh trì pannalan de luchd-fianaise a chumail aig a’ choinneimh aice air 21 Cèitean agus bheir Rùnaire a’ Chaibineit airson Ceartais fianais air 4 Ògmhios. Thèid barrachd co-chomhairleachaidh air na dùnaidhean a ghabhail os làimh le SCA, agus thathar an dùil gun tèid òrdain gus na cùirtean a dhùnadh a chur fa chomhair Pàrlamaid na h-Alba ro fhosadh an t-samhraidh agus a bheachdachadh le Comataidh a’ Cheartais.
Cuir gairm airson fianais a-steach an seo: Làrach-lìn Comataidh a' Cheartais.
Contact information
Media information
Committee information
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on:
