Coimhearsnachdan a’ tighinn còmhla gus atharrachadh a thoirt gu buil

26.04.2013

Is ann air cumhachd choimhearsnachdan atharrachadh a thoirt gu buil a bhios fòcas nuair a thig riochdairean coimhearsnachd bho air feadh na h-Alba còmhla aig Pàrlamaid na h-Alba airson beachdachaidh an-diugh. Is e seo a’ chiad uair a thàinig uidhir de lìonrathan eadar-dhealaichte còmhla aig a’ Phàrlamaid. Thèid a chraoladh cuideachd beò air an eadar-lìon tron latha.

Aig Co-labhairt Caidreachas Coimhearsnachd na h-Alba bidh riochdairean coimhearsnachd a’ coinneachadh san t-Seòmar-deasbaid aig Pàrlamaid na h-Alba, gus a bhith a’ brosnachadh agus a’ beachdachadh air co-obrachadh is com-pàirt am measg choimhearsnachdan ann an Alba. Nì riochdairean sgrùdadh air mar as urrainn do dhaoine ionadail obair a dhèanamh gus ùghdarras a thoirt dha na coimhearsnachdan aca agus buaidh a thoirt air poileasaidh nàiseanta.

Anns a’ chathair bidh An Leas Oifigear-riaghlaidh, Elaine Nic a' Ghobhain BPA. A’ bruidhinn ron tachartas, thuirt i:

“Tha sinn uile mothachail air an eadar-dhealachadh a dh’fhaodadh a thighinn nuair a bhios daoine sa choimhearsnachd aca ag obair còmhla. Smaoinich air na b’urrainn a choileanadh nuair a thig an t-eòlas agus an fhiosrachadh seo còmhla.

“Tha mi a’ coimhead air adhart ri bhith a’ cur fàilte air Caidreachas Coimhearsnachd na h-Alba gu Pàrlamaid na h-Alba agus a’ cluinntinn mu na fìor atharrachaidhean a rinn iad anns na h-àiteachan far a bheil iad a’ fuireach agus ag obair.”

Tha fòcas làidir air ùghdarrasachadh coimhearsnachd air a bhith air obair Comataidh Riaghaltas Ionadail agus Ath-ghinealachaidh o chionn ghoirid. Bidh buill na Comataidh a’ frithealadh na co-labhairt gus beachdan dhaoine fhaighinn agus seo a bhiathadh a-steach gus sgrùdaidhean gnàthaichte na Comataidh air ath-leasachadh sheirbheisean poblach agus ath-ghinealachadh a lìbhrigeadh ann an Alba.

Thuirt Leas Neach-gairm na Comataidh Iain MacUilleam BPA:

“Tha ùghdarrasachadh coimhearsnachd mu bhith a’ dèanamh cinnteach gu bheil cothrom aig daoine ionadail an guth a thogail mu na bhios a’ tachairt anns na coimhearsnachdan aca. Tha e mu dheidhinn cumhachd a thoirt dha daoine fìor atharrachadh a dhèanamh agus gum bi an atharrachadh sin na bhuannachd dhan h-uile duine.

“Chunnaic a’ Chomataidh againn mu-thràth a’ bhuaidh adhartach a thig bho bhith toirt cothrom dha buidhnean coimhearsnachd a bhith an sàs ann an lìbhrigeadh sheirbheisean poblach is ath-ghinealachadh. Tha cothrom ann tòrr a bharrachd a dhèanamh agus tha sinn airson cluinntinn gu dìreach bho na buidhnean coimhearsnachd dè an tuilleadh a tha iad airson a dhèanamh. Bheir seo taic don Chomataidh agus iad ag ullachadh airson sgrùdadh a dhèanamh air reachdas ùghdarrasachadh coimhearsnachd an ath-bhliadhna agus tha sinn a’ coimhead air adhart ri bhith a faicinn fìor chom-pàirt coimhearsnachd ann am prògraman ath-ghinealachaidh air feadh na h-Alba.”

Cùl-fhiosrachaidh

Bidh Caidreachas Coimhearsnachd na h-Alba a’ toirt lìonrathan roinn coimhearsnachd adhartach na h-Alba còmhla. Is e an dà phrìomh amas a th’aca a bhith a’ brosnachadh obair dhaoine ionadail anns na coimhearsnachdan aca agus buaidh a thoirt air leasachadh poileasaidh nàiseanta.

Thèid an tachartas, a’ toirt a-steach seiseanan Seòmair is buidhnean deasbaid sònraichte, a chraoladh beò air an eadar-lìon air a’ cheangal a leanas:

http://www.scottish.parliament.uk/newsandmediacentre/30875.aspx