29.04.2013
Thèid reachdas – a bhios ag amas air dol an sàs ri droch bhuaidh riaghlaidh, nach cuirear an gnìomh gu cunbhalach, tro bhith a’ leasachadh mar a nithear seo air feadh Alba, ’s aig an aon àm a’ toirt taic do dh’fhàs eaconamach seasmhach – a sgrùdadh leis a’ Chomataidh Eaconamaidh, Lùths is Turasachd.
Thuirt neach-gairm na Comataidh, Murchadh Friseal BPA:
“Bheir riaghladh buaidh air a h-uile raon de bheatha, o mar a nithear co-dhùnaidhean dealbhaidh nar sgìrean ionadail gu sàbhailteachd ar bìdh agus ìre feabhais ar cùram-slàinte.
“Tha am Bile seo ag amas air ’s gun cuirear riaghladh an gnìomh gu cunbhalach thar Alba a chor is gum bi e nas fhasa do bhuidhnean an obair a dhèanamh. Leis mar a tha droch shuidheachadh na h-eaconamaidh an ceartuair, cuiridh e cuideachd dleastanas air luchd-riaghlaidh a bhith ag obrachadh ann a leithid de dhòigh a bhios cuideachail a thaobh fàs seasmhach na h-eaconamaidh.
“Bu toil leis a’ Chomataidh raon farsaing de bheachdan a chluinntinn a chor is gun dèan sinn sgrùdadh air an reachdas seo gu mionaideach agus gus dèanamh cinnteach gun toirear a-mach na bhios san reachdas seo.”
Tha a’ Chomataidh ag iarraidh bheachdan air pàirt 1, 3 is 4 den Bhile Ath-leasachaidh Riaghlaidh (Alba):
· Pàirt 1: Gnìomhan riaghlaidh: Bheir seo cumhachd do Mhinistearan na h-Alba riaghladh a chur ri chèile a chor is gum brosnaichear cunbhalachd a thaobh gnìomhan riaghlaidh. Faodaidh Ministearan na h-Alba, tro riaghladh, ullachadh sam bith a dhèanamh a bhios, nam beachdsan, a’ brosnachadh neo a’ leasachadh cunbhalachd am measg luchd-riaghlaidh.
· Cuideachd, cuiridh e dleastanas air luchd-riaghlaidh clàraichte gnìomhan a dhèanamh ann an leithid de dhòigh a chuidicheas ann a bhith a’ toirt a-mach fàs eacomanach seasmhach.
· Pàirt 3: Rudan measgaichte:
Co-dhùnaidhean a thaobh cead obair-mhara: Rachadh an dòigh sam bithear a’ cur an lagh an gnìomh mu cho-dhùnaidhean a thaobh lùths na mara a dhèanamh na bu chunbhalaiche a rèir ath-sgrùdaidhean dealbhaidh is rathaidean, cho math ris a’ phròiseas laghail tro dh’fhaodadh dùbhlan laghail a chur, agus bidh seo a rèir teoran-tìme teann.
Gnìomhan ùghdarrasan-dealbhaidh: Leigidh an ullachadh seo le Ministearan na h-Alba cìsean dealbhaidh atharrachadh a rèir coileanadh an ùghdarrais-dhealbhaidh.
Cead luchd-malairt sràide: Nì an ullachadh seo comasach e gun tèid aon theisteanas measgaichte a thoirt am follais leis an ùghdarras-bìdh ris a bheil an gnìomhachas clàraichte.
· Pàirt 4: Ullachaidhean coitcheann:
Nì a’ Chomataidh airson Gnothaichean Dùthchail, Atharrachadh Sìde is Àrainneachd sgrùdadh air pàirt 2 den bhile a bhuineas ri riaghladh na h-àrainneachd agus air an eileamaid de phàirt 1 mar a bhuineas seo ri raon-ùghdarrais Chomataidh GDASA a chuireas dleastanas air luchd-maoineachaidh a thaobh fàs seasmhach na h-eaconamaidh.
Cùl-sgeul
Am measg luchd-riaghlaidh air am buail am bile seo, tha: Cunntasair a’ Bhristeadh-chreideis, Buidheann Ìre a’ Bhìdh, Buidheann Leasachaidh Cùram-slàinte na h-Alba, Ùghdarrasan ionadaile, Buidheann-riaghlaidh Cathrannais na h-Alba, Buidheann Dìon Àrainneachd na h-Alba, Buidheann-riaghlaidh Taigheadais na h-Alba, Dualchas Nàdair na h-Alba, Buidheann Leasachaidh Cùram Sòisealta is Obair Shòisealta na h-Alba agus TadhalAlba.
Nam bu toil leibh fianais sgrìobhte a chur a-steach, ’s e Diardaoin 6 Ògmhios an ceann-latha mu dheireadh. Bu chòir fianais sam bith a bhith goirid agus sgrìobhte air cruth Word ’s a bhith air a cur gu
regreformbill@scottish.parliament.uk.
Fios conaltraidh
Fios conaltraidh
Fios comataidh
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: