29.04.2013
Thèid reachdas – a tha ag amas air riaghladh dìon ar n-àrainneachd a dhèanamh nas simplidhe agus a bheir a-steach cumhachdan ùra a thaobh cur-an-gnìomh agus binn laghail an aghaidh eucoir na h-àrainneachd – a sgrùdadh leis a’ Chomataidh airson Gnothaichean Dùthchail, Atharrachadh Clìomaid is na h-Àrainneachd.
A’ labhairt agus a’ Chomataidh a’ cur air dòigh iarrtas beachdan air Bile Ath-leasachaidh Riaghlaidh (Alba), thuirt Neach-gairm na Comataidh, Rob Gibson BPA:
“Tha a bhith a’ dìon na h-àrainneachd cudromach, chan ann a-mhàin gus iomadachd ar fiadh-bheatha a ghlèidheadh ach cuideachd air sgàth nam mìltean de dhaoine a bheir tlachd às bòidhchead nàdarra na h-Alba, cho math ri prìomh roinnean ar n-eaconamaidh – o obair tuathanas gu turasachd.
“Daingnichidh an reachdas seo cumhachdan cur-an-gnìomh agus binn laghail, leis an amas gum bi dìon nas fheàrr air ar n-àrainneachd.
“Tha ar Comataidh ag iarraidh raon farsaing de bheachdan a chluinntinn a chor is gun coimhead sinn air na molaidhean gu mionaideach agus dèanamh cinnteach gun lìbhrig iad na tha a dhìth air sgàth àrainneachd na h-Alba.”
Coimheadaidh a’ Chomataidh gu sònraichte air Pàirt 2 den Bhile a bhuineas ri riaghladh na h-àrainneachd, agus thathar a’ sireadh bheachdan air na ceistean a leanas:
· Na molaidhean mu chumhachdan-riaghlaidh Ministearan na h-Alba a thaobh an àrainneachd a dhìon is a leasachadh, gnìomhan àrainneachdail a riaghladh agus dleastanasan iomchaidh an AE a chur an gnìomh.
· Molaidhean mu chumhachdan cur-an-gnìomh a bhith aig BDAA/SEPA, a’ gabhail a-steach cumhachd peanasachaidh airson neo-ghèillidh, cur-an-gnìomh agus peanas is faotainn-air-ais chosgaisean.
· Molaidhean mu chumhachdan a thèid a thoirt do na Cùirtean a thaobh òrduighean-dìolaidh, beachdachadh air buannachdan ionmhais nuair a bhithear a’ leigeil chàin, agus òrduighean a thaobh foilleasachd.
· Molaidhean a bhuineas ri ùghdarrasan ionadaile a thaobh fearainn a chaidh a thruailleadh, làraichean sònraichte agus measaidhean ìre-feabhais an àile.
· Molaidhean a thaobh atharrachaidhean a thoirt air obair fharsaing BDAA gus dèanamh cinnteach gum bi iad, an lùib na h-obrach aca, a’ cur ri slàinte is beothalachd muinntir na h-Alba agus a’ toirt a-mach fàs seasmhach na h-eaconamaidh.
· Air an eileamaid de phàirt 1, mar a bhuineas seo ri raon-ùghdarrais Chomataidh GDAA, gun cuirear dleastanas air luchd-maoineachaidh a thaobh fàs seasmhach na h-eaconamaidh.
Cùl-sgeul
’S i a’ Chomataidh airson Eaconamaidh, Lùths is Turasachd a bhios a’ stiùireadh chùisean ann a bhith a’ beachdachadh air a’ Bhile, a’ coimhead air Pàirt 1, 3 agus 4. ’S i GDAA an dàrna Comataidh a bheir sùil air na Pàirtean a tha a rèir an raon-ùghdarrais acasan. Bidh na pàirtean eile den Bhile ag amas air dol an-sàs ris an droch bhuaidh a tha aig riaghladh nach cuirear an gnìomh gu cunbhalach tro bhith a’ leasachadh mar a thèid seo a chur an gnìomh air feadh Alba, ’s aig an aon àm a’ cur taic ri fàs seasmhach na h-eaconamaidh.
Nam bu toil leibh fianais a chur a-steach, ’s e an ceann-latha mu dheireadh airson beachdan sgriobhte Diluain 20 Cèitean 2013. Is fheàrr leis a’ Chomataidh stuth sgrìobhte fhaotainn air cruth dealain. Bu chòir seo a chur gu: racce@scottish.parliament.uk.
Fios conaltraidh
Fios do na meadhanan
Fiosrachadh comataidh
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: