“Cleachd do chuid ghàidhlig”, Luchd-tadhail don phàrlamaid gam brosnachadh

15.05.2013

Tha Pàrlamaid na h-Alba a’ cur fòcas air a seirbheisean Gàidhlig, a’ brosnachadh luchd-tadhail, BPAan agus a luchd-obrach a bhith a’ cleachdadh nan cothrom a th’ ann a bhith ga bruidhinn no ag ionnsachadh mun chànain.

Tha an iomairt mar phàirt de dhealas leantainneach na Pàrlamaid gus an aon spèis a thoirt don Ghàidhlig ’s a thathar a’ toirt don Bheurla.

Thuirt Oifigear Leasachaidh na Gàidhlig aig Pàrlamaid na h-Alba, an t-Oll. Alasdair MacCaluim:

“Tha Gàidhlig aig cridhe dualchas na h-Alba ’s bu toil leinn a bhith a’ brosnachadh a h-uile neach aig a bheil a’ Ghàidhlig ur cuid Ghàidhlig a chleachdadh nur Pàrlamaid.

“Tha luchd-tadhail agus luchd-obrach aig nach eil a’ chànain gam brosnachadh cuideachd a bhith a’ cleachdadh a’ chothruim gus barrachd ionnsachadh mun chànain bheairteach dhùthchasach seo.”

Cùl-fhiosrachadh

Tha Plana Gàidhlig Buidheann Chorporra Pàrlamaid na h-Alba 2013 gu 2018 a’ nochdadh nam planaichean-leasachaidh, nam measg mar a thèid Gàidhlig a chleachdadh ann an obair na Pàrlamaid agus ann an conaltradh ris a’ phoball, ri Buill agus ri luchd-pàirteachais.

Faodar sealltainn air na gnìomhan gu lèir sa Phlana Ghàidhlig an seo.

Thathar air am Plana ullachadh a rèir nan slatan-tomhais reachdail ann an Achd na Gàidhlig (Alba) 2005.

Dh’iarr an SPCB air a’ phoball an cuid bheachdan a nochdadh mu na molaidhean airson a’ phlana an-uiridh:

• Fhuaireadh 56 de bheachdan, àrdachadh de 65 a-mach às a’ cheud air a’ chomhairleachadh a bh’ ann roimhe. Fhuaireadh 34 de fhreagairtean air a’ chomhairleachadh mun chiad phlana ann an 2007:
• Thàinig 45 a-mach às a’ cheud de na freagairtean bho dhaoine agus bho dhaoine an taobh a-muigh nan sgìrean Gàidhlig;
• Dh’aontaich 47 de na freagairtean ri claonadh coitcheann a’ phlana, bha ochdnar nach do dh’aontaich agus aonan nach deach taobh seach taobh;
• Bha 29 de na freagairtean sa Ghàidhlig. Bha 27 dhiubh sa Bheurla.