Don Giovanni a' tighinn gu Taigh an Ròid

07.11.2013

Bidh Taigh an Ròid mar àrd-ùrlar le mealladh, brath is fiù ’s murt air chois nas fhaide air adhart an-diugh agus Opera Alba a’ cur Pìos Beag de Don Giovanni air dòigh ann am Prìomh Thrannsa aig Pàrlamaid na h-Alba.

Thèid opera ainmeil Mozart a chur an làthair ann an taisbeanadh 20-mionaid le seinneadair, neach-cluiche beus-fhidhill is giotàiriche, le taic o sgeulaiche agus sreath de dhealbhan dathte.

Tha am meanbh-dhràma seo a’ dol air turas cuide ri taisbeanadh mòr iomlan Opera Alba agus chaidh a chur ri chèile a chor ’s gun gabhadh opera a thoirt a-steach gu ionadan neo-àbhaisteach agus gus a chur an làthair do luchd-coimhid ùra.

Thuirt an t-Oifigear Riaghlaidh, Am Ball Fìor Urramach Tricia Marwick BPA:

“Tha na seiseanan beaga seo, a bheir “blas” do dhaoine, mar fhìor dheagh dhòigh air opera a thoirt an làthair do luchd-coimhid ùra agus tha a’ Phàrlamaid glè thoilichte àrd-ùrlar a chur air dòigh an-diugh do rud a tha air tè dhe na h-obraichean-dràma as ainmeile a rinn Mozart a-riamh.

“Tha sinn glè thoilichte cothrom-taisbeanaidh a thoirt do shàr-chultar na h-Alba ann am Pàrlamaid na h-Alba.  Tha fhiosam gun toir na BPAan, luchd-obrach agus ar luchd-tadhail tlachd às an taisbeanadh.”

Bidh Pìos Beag de... Don Giovanni air chois ann am Prìomh Thrannsa na Pàrlamaid air Diardaoin 07 Samhain aig 1.30f. Bidh am Prìomh Thrannsa fosgailte do luchd-tadhail mar is àbhaist agus tha an dràma saor ’s an asgaidh.

Cùl-sgeul

Bidh na taisbeanaidhean Pìos Beag de... aig Opera Alba a’ toirt opera a-mach às an taigh-chluiche ’s a-steach gu ionadan far nach biodh dùil rithe, agus tha iad fìor fhreagarrach do neach sam bith nach eil cleachdte ri opera. Thèid gach dràma a chur an làthair tron ealain àrsaidh às Seapan, ‘Kamishibai’ – cleachdar bogsa-tèatair de mheud meatair anns am bi deich no dusan dealbh ag innse an sgeòil.

Tha sgeulachd Pìos Beag de Don Giovanni a’ leantainn casanòbha cliùiteil Mozart o leannan gu leannan. Ach nuair a gheibh athair Donna Anna bàs ri linn a chuid meallaidh, a bheil e air a dhol ro fhada mu dheireadh thall?

Agus e air turas ann an Alba as t-Fhoghar, cuide ri taisbeanadh iomlan Opera Alba de Don Giovanni, tha an geàrr-leagan 20-mionaid seo de shàr-obair Mozart dìreach ceart do neach sam bith a tha a’ dol a choimhead air opera airson a’ chiad uair.

Tha Pìos Beag de Don Giovanni saor ’s an asgaidh, ’s cha ruigear a leas suidheachan a chur air leth.

Sa Chèitean an-uiridh, nochd Pìos Beag de Tosca le Opera Alba fo sgèith na Pàrlamaid.