08.11.2013
Thathar a’ cur taic ri prionnsapalan coitcheann Bile a’ Phòsaidh is a’ Chaidreachais Shìobhalta (Alba) leis a’ mhòr-chuid de bhuill sa Chomataidh airson Co-ionannachd Chothroman san aithisg Ìre 1 aca, a chaidh fhoillseachadh an-diugh.
Tha beag-chuid de bhuill na Comataidh nach eil a’ cur taic ris a’ Bhile o chionn ’s nach aontaich iad ann am prionnsapal air neo nach eil iad gu tur cinnteach gu bheil gu leòr a dhìon sa Bhile an ceart-uair.
Thuirt Neach-gairm na Comataidh, Mairead NicUallaich BPA:
“Tha a h-uile neach againn air a’ Chomataidh ag aithneachadh iomchaidheachd, doimhne is dùrachd gach beachd a chaidh a chur thugainn air cùis a tha, gu soilleir, a’ togail connspaid is faireachdainnean làidir am measg nan com-pàirtichean uile againn.
“Ged a tha a’ mhòr-chuid de bhuill ar Comataidh a’ cur taic ri prionnsapalan coitcheann a’ Bhile seo, tha sinn a’ cur làn-thaic ri còir is ceartas gach ball de Phàrlamaid na h-Alba bhòt a chaitheamh air a’ Bhile mar ghnothach a bhuineas ri mar a dh’fhairicheas iad fhèin.”
Tha a’ Chomataidh air iarraidh air Riaghaltas na h-Alba beachdachadh air grunn cheistean, nam measg:
· Beachdan air leth gach com-pàirtiche air an dòigh a leanar anns a’ Bhile a thaobh saorsa luchd-stiùiridh is bhuidhnean cràbhach a dhìon ann a bhith os cionn phòsaidhean a tha iomchaidh laghail a rèir teagasg an creideamhan fhèin.
· Atharrachadh a chaidh a thogail le Comhairle Albannach nan Coimhearsnachdan Iùdhach gus mìneachadh ùr a thoirt air pòsaidhean neo-shìobhalta, a chor is gum bithear a’ comharradh gu ìre nas soilleire dè an diofar a tha eadar deas-ghnàthan creidmheach (religious) is deas-ghnàthan feallsnachdail (belief).
· Beachd a chuireadh an cèill le Comann Daonnachais na h-Alba gu bheil mar a dhèiligear ri pòsadh ann an lagh bainnse Eaglais na h-Alba a’ toirt inbhe pribhleideach dha.
· Gun tèid aonta-cèile a thoirt air falbh o phròiseas-aithneachaidh gach gnè.
Cùl-sgeul
Chaidh Bile a’ Phòsaidh is a’ Chaidreachais Shìobhalta (Alba) a thoirt a-steach sa Phàrlamaid air 26 Ògmhios 2013 agus dèiligidh e ris na prìomh chùisean seo a leanas a tha a’ buintinn ri lagh a’ phòsaidh: toirt a-staigh pòsadh eadar aon ghnè; luchd-stiùiridh creidimh a bhith co-ionann ri luchd-stiùiridh cràbhaidh; mar a bheirear cead is ùghdarras do luchd-stiùiridh pòsaidhean aon ghnè is eile a shòlaimicheadh; caidreachasan sìobhalta a dh’atharraicheas gu pòsaidhean; cead is ùghdarras diacoin Eaglais na h-Alba pòsadh eadar dà ghnè a shòlaimicheadh agus a bhith a’ ceadacheadh deas-ghnàthan pòsaidh sìobhalta ann an àite sam bith a thèid aontachadh eadar an dithis agus an neach-clàraidh, seach ann an ionadan cràbhach.
Bidh deasbad Ìre 1 air Bile a’ Phòsaidh is a’ Chaidreachais Shìobhalta (Alba) air chois san t-Samhain.
Fios conatraidh
Media information
Committee information
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: