11.11.2013
Thèid sgrùdadh a dhèanamh le Comataidh Riaghaltas Ionadail is Ath-bheothachadh aig Pàrlamaid na h-Alba air ceuman a tha ag amas air cùisean a dhèanamh nas fhasa do dh’ùghdarrasan ionadaile airgead a chaidh a chosg ann a bhith a’ càradh togalaichean cunnartach fhaighinn air ais. Tha a’ Chomataidh airson cluinntinn bhuapasan air a bhiodh buaidh aig a’ Bhile, nam measg gnìomhachasan, ùghdarrasan ionadaile is buidhnean eile, a thaobh a bheil an reachdas cho math ’s a ghabhas agus am bi e ag obrachadh gu ceart.
Air a thoirt a-steach le Dàibhidh Stiùbhart BPA, tha Bile Thogalaichean Easbhaidheach is Cunnartach (Ath-phàigheadh Chosgaisean) (Alba) ag amas air ‘òrduighean cìse’ a thoirt a-steach a leigeas le h-ùghdarrasan ionadaile an cuid chosgaisean fhaighinn air ais far an d’ rinn iad obair air togalaichean easbhaidheach is cunnartach.
Thuirt Neach-gairm na Comataidh, Caoimhin Stiùbhart BPA:
“Tha a bhith a’ cumail a’ mhòr-shluaigh sàbhailte o thogalaichean easbhaidheach is cunnartach mar ròl glè chudromach do dh’ùghdarrasan ionadaile thar Alba. Gu soilleir, tha fàilte ri cur air ceuman sam bith a bhios ag amas air comas ùghdarrasan ionadaile a leasachadh a thaobh an obair-chàraidh seo a ghabhail os làimh.
“Gidheadh, ’s e am fiosrachadh a tha a dhìth air a’ Chomataidh againne ach am bi na molaidhean anns a’ Bhile ag obrachadh gu ceart agus an i seo, san da-rìribh, an dòigh as fheàrr a bhith a’ toirt misneachd do dh’ùghdarrasan ionadaile gum faigh iad cosgaisean air ais a chaith iad air togalaichean a chàradh? ’S ann a-mhàin le bhith a’ cluinntinn on fheadhainn air a bhiodh buaidh aige seo ’s is urrainn dhuinn dèanamh cinnteach gur ann mar seo gu dearbh a bhios.”
Cuiridh a’ Chomataidh fàilte air cluinntinn bhuapa aig a bheil ùidh sa Bhile. Gu sònraichte, ’s e am fiosrachadh a tha a dhìth air a’ Chomataidh ach:
- Ciod iad buannachdan is neo-bhuannachdan a’ Bhile a thathar a’ moladh?
-
Co-dhiù an toir am Bile piseach air comas ùghdarrasan càradh a ghabhail os làimh air togalaichean cunnartach is leibideach gus nach toir.
- Cò às a thig a’ chiad chalpa a tha a dhìth?
-
Far nach eil fios air cò leis a tha togalach, ciamar an toir am Bile piseach air cùisean mar a tha iad an ceartuair?
-
Carson a tha an dòigh-obrach sa Bhile seo nas fheàrr seach an dòigh a nochd o chionn ghoirid ann an co-chomhairleachadh Riaghaltas na h-Alba air Ùghdarrachadh Choimhearsnachdan?
Cùl-fhiosrachadh
Chaidh Bile Thogalaichean Easbhaidheach is Cunnartach (Ath-phàigheadh Chosgaisean) (Alba) a thoirt a-steach gu Pàrlamaid na h-Alba air 30 an Dàmhair 2013. Gheibhear fiosrachadh mun Bhile aig a’ cheangal a leanas:
http://www.pàrlamaidnahalba.ra/gnothaicheannapàrlamaid/Bilean/69042.aspx
Leigidh prìomh phrionnsapalan a’ Bhile le h-ùghdarrasan ionadaile òrduighean cìse (a nì ceangal cinnteach eadar an togalach agus am fiach) a chur ri chèile gus na chosg iad air càradh thogalaichean leibideach no cunnartach fhaotainn air ais.
’S e 31 Faoilleach 2014 an ceann-latha mu dheireadh airson thagraidhean.
Bu chòir tagraidhean gun a bhith nas motha na ochd duilleagan A4. Bu chòir freagairtean a bhith air an cur, gu dealanach far an gabh seo a dhèanamh, agus ann an cruth MS Word, gu: DDbuildingsbill.lgrc@scottish.parliament.uk
Cuiridh sinn fàilte air tagraidhean sa Ghàidhlig.
Faodar freagairtean a bhith air an cur tron phost cuideachd gu:
Clàrc Comataidh Riaghaltas Ionadail is Ath-bheothachadh
Oifis na Comataidh
Seòmar T3.40
Pàrlamaid na h-Alba
Dùn Èideann
EH99 1SP