Suidhichidh an t-Oifigear Riaghlaidh ceann-latha airson Fo-thaghadh Cowdenbeath

22.11.2013

Thèid fo-thaghadh Cowdenbeath a chumail air Diardaoin 23 Faoilleach 2014, chaidh ainmeachadh.

Fo earrainn 9 de dh’Achd na h-Alba 1998, ’s ann aig Oifigear Riaghlaidh Pàrlamaid na h-Alba a bhios latha a’ bhòtaidh suidhichte.

Madainn an-diugh tha an t-Oifigear Riaghlaidh Tricia Marwick air sgrìobhadh gu Steve Grimond, Ceannaird Chomhairle Fìobha, mar Oifigear Taghaidh, gus a roghainn mar cheann-latha a dhearbhadh agus gus iarraidh air gun tèid gach rud a chur air chois airson an Fho-thaghaidh.                                                                     

Chaidh fios a thoirt do BhPAan mu latha a’ bhòtaidh a chor is gun lìonar dreuchd na sgìre-phàrlamaid a chaidh fhàgail bàn an dèidh bàs Helen Eadie BPA.

Tha Earrann  9 de dh’Achd na h-Alba 1998 a’ toirt iomraidh air: 

9 Dreuchdan san sgìre-phàrlamaid

(1)Far a bheil seat ball sgìre-phàrlamaid bàn, thèid taghadh a chumail gus a’ bheàrn sin a lìonadh (a rèir fo-earrainn (4)). 

(2)Thèid ceann-latha a’ bhòtaidh a shuidheachadh aig an Oifigear Riaghlaidh.

(3)Bidh an ceann-latha ri linn treise trì mìos—  

(a)a’ tòiseachadh o àm na bèirn, no   

 (b) mura tig a’ bheàrn gu aire an Oifigear Riaghlaidh taobh a-staigh aona mhìos o àm na bèirn, tòisichidh seo nuair a thig e gu aire an Oifigeir.

(4)Cha tèid an taghadh a chumail mas e is gun tuiteadh an ceann-latha a bu deireannaich airson a’ bhòtaidh taobh a-staigh treise trì mìos, a’ crìochnachadh air an latha sam biodh a’ bhòt air a chumail aig an ath thaghadh coitcheann (gun aire a thoirt air earrann 2 (5)).  

(5)Air sgàth na h-earrainn seo, bidh an ceann-latha air an tèid cur roimhe gu bheil a’ bheàrn air nochdadh air a dhearbhadh a rèir nan gnàth-riaghailtean.

(6)Chan fhaod neach a bhith mar thagraiche aig leithid de thaghadh mas ball Pàrlamaid iad no mar thagraiche ann an taghadh eile gus beàrn a lìonadh.   

Cùl-fhiosrachadh

Aig àm suidheachadh ceann-latha a’ bhòtaidh, nì an t-Oifigear Riaghlaidh (OR) na leanas:

·         Co-chomhairleachadh ri Oifigear an Taghaidh (OT) – cuiridh an OT cuideam air duilgheadasan sam bith a bhuineas ri àm a’ bhòtaidh no coileanadh riatanasan laghail sam bith eile;

·         Beachdan iarraidh air gach gin de na prìomh phàrtaidhean mu cuin a ghabhas a’ bhòt a chumail, a’ tòiseachadh leis a’ phàrtaidh aig an robh an seat; aithnichidh an OT an co-ghnàths gur ann aig a’ phàrtaidh sin a tha a’ bhuaidh as motha air pròiseas co-dhùnaidh an OT, ach bidh i saor a roghainn fhèin a dhèanamh mar a chì i iomchaidh sin; 

·         Co-dhùnadh crìochnaichte a dhèanamh air a’ cheann-latha agus sin innse don OT is don Phàrlamaid.