22.11.2013
Thèid cor roinn ealain is cultair na h-Alba a sgrùdadh le Comataidh Foghlam is Cultar aig Pàrlamaid na h-Alba nuair a ghabhas i fianais o Cheannard Alba Chruthachail cho math ri ceathrar de phrìomh luchd-ealain ann an Alba air Dimàirt 26 Samhain.
San Dàmhair 2012, sgrìobh 100 neach-ealain ann an Alba litir fhosgailte gu Alba Chruthachail a bha a’ cur an cèill dragh gun robh a’ bhuidheann – air a bheil e mar dhleastanas taic is eile a chumail ris a’ ghnìomhachas chruthachail ann an Alba – a’ fàiligeadh a thaobh seo.
Bliadhna air adhart, bidh a’ Chomataidh ag èisteachd ri fianais o ghrunn neach-ealain, nam measg am Bàrd Albannach Liz Lochhead, agus an neach-dràma is stiùiriche David Grieg, dithis a chuir an ainm ri litir 2012, ach am faicear a bheil feabhas air a thighinn air a’ chùis agus dè eile a dh’fheumas atharrachadh. An uair sin èistidh a’ Chomataidh ri Ceannard Alba Chruthachail, Janet Archer.
Thuirt Neach-gairm na Comataidh, Stewart Maxwell BPA:
“Tha còir aig Alba a bhith moiteil às an roinn làidir ealain is cultar aice, rudan as cinnteach a tha am measg nan gnothaichean as soirbheachaile a chuirear a-mach air an t-saoghal againn. Bha tòrr atharrachaidhean ann sa bhliadhna a chaidh seachad agus tha a’ Chomataidh againn airson faighinn a-mach a bheil na h-atharrachaidhean sin a’ toirt deagh bhuaidh air luchd-ealain na h-Alba.”
Am measg luchd-ealain eile a bheir seachad fianais bidh Gillian Berrie, a rinn fiolmaichean leithid My Name is Joe, Ratcatcher agus Red Road, is Judith Doherty, Ceannard is Co-stiùiriche Ealain aig companaidh tèatair Grid Iron, a tha stèidhichte ann an Dùn Èideann.
Cùl-fhiosrachadh
Ann an Sultainn 2012, fhuair a’ Chomataidh fianais o Andrew Dixon, a bha aig an àm mar Cheannard Alba Chruthachail. Feadhainn eile a thug seachad fianais aig a’ choinneimh sin, b’ iad an neach-ealain Matt Baker, Gwilym Gibbons, Stiùiriche aig Buidheann-leasachaidh Ealain Shealtainn agus Francis McKee, Stiùiriche Ionad nan Nua-Ealain.
Faodar coimhead coinneamh na Comataidh Dimàirt air làrach-lìn na Pàrlamaid aig:
http://www.pàrlamaidnahalba.ra/ionadnaidheachdismeadhanan/3168.aspx
Contact information
Media information
Committee information
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: