Ceangal nas soilleire ri poileasaidhean nàiseanta a dhìth anns an Fhrèama Planaidh Nàiseanta

Cuideachd, molaidh aithisg na Comataidh gum bu chòir frèamaichean planaidh leantainneach a bhith a’ leigeil le Pàrlamaid na h-Alba a bhith an-sàs aig ìre nas traithe a chor is gum bi seo a’ cuideachadh ann a bhith a’ cur cumadh air na slatan-tomhais agus na seòrsaichean de leasachaidhean nàiseanta a bhios a dhìth air Alba sna bliadhnaichean ri teachd.

A bharrachd air seo tha an aithisg a’ cur cuideam air mar a dh’fhàillig a’ chuid a bu mhotha de dh’ùghdarrasan ionadail dèanamh cinnteach gu bheil plana leasachaidh ionadail an-sàs aca, rud a tha riatanach a rèir an lagh. Tha seo a’ cur bacadh air lìbhrigeadh siostam planaidh co-leantainneach gu nàiseanta.

Thuirt Neach-gairm na Comataidh, Caoimhin Stiùbhart BPA:

“Tha e mar bhrosnachadh dhuinn gun do chaith Riaghaltas na h-Alba ùine ann a bhith a’ dol an-sàs ann an co-chomhairleachadh farsaing cuide ris a’ mhòr-shluagh air feadh na dùthcha ann an dòigh cheart bhrìghmhor, rud a thàinig gu buil le dreach Frèama Planaidh Nàiseanta aig an àm cheart. Gidheadh, tha èifeachd an t-siostaim phlanaidh air a lagachadh ri linn grunn ùghdarrasan ionadail a bhith a’ briseadh nan dleastanasan reachdail aca a thaobh planaichean leasachaidh ionadail a bhith an-sàs.

“’S e beachd ar Comataidh gum faodadh cur ri èifeachd an Fhrèama Phlanaidh Nàiseanta tro bhith a’ leigeil le Pàrlamaid na h-Alba a bhith an-sàs aig gach ìre thùsail, gu h-àraid a thaobh a bhith a’ cur an cèill gach slat-tomhais airson gach seòrsa de leasachadh nàiseanta a tha a dhìth air Alba. A bharrachd, tha sinn a’ beachdachadh air làn-aonachadh de phlanadh coimhearsnachd is cleachdadh-fearainn. Bidh ùghdarrasan ionadail, an t-Seirbheis Leasachaidh agus Buidheann Phlanaidh Choimhearsnachdan Nàiseanta a’ coileanadh prìomh ròl ann a bhith a’ dèanamh cinnteach gun tachair seo gu dearbh.”

Cùl-fhiosrachadh

Chaidh an treas dreach Frèama Planaidh Nàiseanta (FPN) a chur fa chomhair na Pàrlamaid air 14 Faoilleach.

Rinn ceithir comataidhean sgrùdadh air an FhPN airson cheistean a bhuin riutha fhèin. A bharrachd air Comataidh Riaghaltas Ionadail is Ath-bheothachadh, b’ iad na comataidhean eile ach Comataidh an Eaconamaidh, Lùths is Turasachd, Comataidh Bun-structair is Cur-an-Seilbh Calpa agus Comataidh Cùisean Dùthchail is Atharrachadh Clìomaid.