Seasamh nas cruaidhe a thaobh seachnadh cìsean a’ faotainn taic o Chomataidh an Ionmhais

02.05.2014

Chaidh fàilte a chur air seasamh nas cruaidhe a thaobh seachnadh chìsean aig Comataidh an Ionmhais san aithisg Ìre 1 aca air Bile Teachd-a-steach na h-Alba is Cumhachdan Chìsean, a chaidh fhoillseachadh an-diugh.

Tha a’ Chomataidh air fàilte a chur air fòcas a’ Bhile a thaobh dol an glaic ri seachnadh chìsean agus riaghailt choitcheann an aghaidh seachnadh (general anti avoidance rule no GAAR) air a toirt a-steach. Cuiridh an GAAR an comas Buidheann Teachd-a-steach na h-Alba dol an aghaidh seachnadh tro bhith a’ cleachdadh dheuchainnean a sheallas a bheil no nach eil rèiteachadh chìsean “fuadain”. 

Thuirt Neach-gairm Comataidh an Ionmhais, Coinneach Gibson BPA: 

“’S i an fhìrinn gum bi droch bhuaidh oirnn uile nuair nach pàigh daoine an cuid chìsean. Nì am Bile cinnteach gum bi Alba a’ dèiligeadh gu cruaidh dian ri luchd-seachnaidh chìsean, agus bidh cùisean nas cinntiche do luchd-pàighidh chìsean na h-Alba. 

“Cuideachd, cumaidh sinn oirnn a’ dèanamh mion-sgrùdadh air stèidheachadh Buidheann Teachd-a-steach na h-Alba agus cur-an-gnìomh is lìbhrigeadh chìsean tiomnaichte.” 

Tha Comataidh an Ionmhais cuideachd a’ cumail taic ri prionnsapalan coitcheann a’ Bhile aig Ìre 1. Tha an aithisg cuideachd - 

• Ag aithneachadh gu bheil feum aig luchd-pàighidh chìsean air dìon a bharrachd agus molar gum feum Buidheann Teachd-a-steach na h-Alba co-chomhairleachadh fhaotainn gu farsaing a thaobh cur-an-gnìomh GAAR mus tèid treòir sam bith fhoillseachadh. 

• A’ moladh toirt-a-steach riaghailt a bheir tùs àite do GAAR thar cheuman reachdail eile. 

• A’ cur fàilte air riatanas Buidheann Teachd-a-steach na h-Alba gun ullaich iad Cùmhnant Sgrìobhte a chuireas an cèill ìrean giùlain is luachan don dà chuid Buidheann Teach-a-steach na h-Alba agus luchd-pàighidh chìsean. 

• A’ cur fàilte air dealas Riaghaltas na h-Alba a thaobh atharrachaidhean aig Ìre 2 a thoirt air adhart gus cur an cèill gu sònraichte deimhinn sa Bhile na bhios gu dìreach ri phàigheadh mar pheanas aca sin nach cum ris na riaghailtean. 

Cùl-fhiosrachadh 

’S e Bile Buidheann Teachd-a-steach na h-Alba is Cumhachdan Chìsean am pìos mu dheireadh de thrì reachdan a thàinig gu bith ri linn Achd na h-Alba 2012. Chaidh an dà phìos eile den reachdas, ’s iad sin Achd Gnothach Fearainn is Togalaichean (Alba) 2013 agus Achd Cìsean Sgudail (Alba) 2014, a dheasbad ’s a chnuasachadh le Comataidh an Ionmhais ann an 2012 agus 2013.