Thuirt neach-gairm na Comataidh, Donnachadh MacNèill BPA:
“Mar Chomataidh tha e cudromach gum faigh sinn a-mach às a’ Phàrlamaid agus tuigse fhaotainn air na dh’fhaodadh tachairt an lùib an reachdais seo.
“Bidh buaidh air luchd-caitheimh bìdh is gnìomhachasan thar Alba aig cruthachadh buidheann inbhean bìdh ùr, ach bha e coltach gum biodh e gu sònraichte iomchaidh gun tadhail a’ Comataidh againn air Obar Dheathain.
“Ann an sgìre Siorramachd Obar Dheathain tha gnìomhachas-iasgaich fìor shoirbheachail, agus sa chathair fhèin tha obair mhòr rannsachaidh a thaobh beathachaidh air a bhith ann agus, thoir fa-near, ’s ann ann a tha a’ Bhuidheann Inbhean Bìdh an ceartuair.”
Thuirt Leas-Neach-gairm na Comataidh, Bob Doris BPA:
“Ged is dòcha gu bheil coltas air a’ ghnothach gu bheil an reachdas a thathar a’ moladh mar atharrachadh rianachd, aig cridhe cùise ’s e seo rud gu math bunaiteach, rud a nì cinnteach gum bi na dh’itheas sinn sàbhailte.
“Tha cliù air Alba air feadh an t-saoghail air sgàth cho math ’s a tha a cuid bìdh is stuthan-òil, agus bidh am bile seo a thathar a’ moladh mar chuideachadh ann a bhith a’ neartachadh a’ chliù sin.
“Mar Chomataidh nì sinn fiùghair ri bhith a’ bruidhinn ri grunn ghnìomhachasan, luchd-sgoilearachd agus, thoir fa-near, a’ Bhuidheann Inbhean Bìdh i fhèin, mu na dh’fhaodadh tachairt an lùib an reachdais seo a thathar a’ moladh.”
Mar phàirt de thadhal na Comataidh air Diluain 26 Cèitean, bidh na BPAan a’ coinneachadh ri:
· Buidheann Inbhean Bìdh na h-Alba, a bhios an ceartuair a’ dèiligeadh ri gnothaichean mar: inbhean bìdh, beathachadh is na dh’itheas daoine; slàinte bìdh san fharsaingeachd; slàinte èisg, maorach is bainne; smachd a thaobh slàinte feòla is na thig à feòil; riaghailtean mu fhodar bheathaichean agus nuadh-bhiadh, sàbhailteachd a thaobh rèidio-eòlais agus suidheachaidhean-èiginn.
· An Institiùd Rowett, Oilthigh Obar Dheathain aig am bi pàirt nach beag a thaobh comas rannsachaidh san RA air beathachadh is slàinte dhaoine agus a tha, tro na bliadhnaichean, air buaidh mhòr a thoirt air cùisean slàinte ‘s beathachadh bheathaichean.
· An t-Oll. Hugh Pennington, sàr-eòlaiche slàinte / inbhean bìdh.
· Joseph Robertson (Obar Dheathain) Earranta, gnìomhachas-bìdh a tha stèidhichte ann an Obar Dheathain ’s a chleachdas, airson a’ chuid is motha, stuth ionadail gus seo atharrachadh gu raon biadh-mara.
· Iomairtean Bìdh an Ear-thuath (Community Food Initiatives North East) carthannas is buidheann-iomairt ionadail a chuireas air dòigh deagh thoradh-bìdh fallain air prìs reusanta do na mìltean de dhaoine ann an Obar Dheathain ’s mun cuairt. Cumaidh iad taic is leasachadh ri slàinte ’s mathas, cuiridh iad ri ath-nuadhachadh choimhearsnachdan, barrachd cothroman cosnaidh a chruthachadh ’s a chur am meud am measg neachan ciorramach ann an coimhearsnachdan nach eil cho math dheth ’s a tha feadhainn eile, agus cuiridh iad air adhart gnìomh sam bith a bheir leasachadh air an àrainneachd.