An dèidh nam mìosan de bhith a’ ghabhail ri fianais, tha a’ Chomataidh air tighinn chun a’ cho-dhùnaidh gu bheil ath-leasachadh shochairean na “adhbhar mòr” ris an àrdachadh air iarratas a chì luchd-solair cobhair-bidhe. Tha fianais a fhuair a’ Chomataidh a’ cur an cèill àrdachaidh mu 400% de dhaoine a’ faighinn cuideachaidh ann an 2013/14 nuair a chuirear an coimeas ris an aon ùine ann an 2012/13.
Gu h-àraidh, tha a’ Chomataidh air dragh a chur an cèill mun bhuaidh a bheir na thathar ag ùghdarrachadh a thaobh shochairean agus tha i ag iarraidh air Riaghaltas na Rìoghachd Aonaichte aithneachadh gu bheil daoine a’ strì gus na feumalachdan bunaiteach aca mu bhiadh a thoirt a-mach mar thoradh air a’ ghnìomh dhìreach aige.
Thuirt Neach-gairm Chomataidh Ath-leasachadh Shochairean, Mìcheal MacMhathainBPA:
“Chan urrainn do Riaghaltas na Rìoghachd Aonaichte gun feart a thoirt a thuilleadh air an fhianais gu bheil na h-ath-leasachaidhean shochairean aca a’ bualadh gu mòr air comas dhaoine a bhith gam biathadh fhèin. Chan eil àite sam bith airson seo ann an dùthaich bheairteach san t-saoghal a tha ann an-diugh. dìreach mar nach bu chòir gum biodh feum air bancaichean-bidhe.
“Nochd an fhianais againn gu bheil feum aig cuid de luchd-obrach air tuarastal ìseal air cothrom air bancaichean-bidhe. Tha seo ga fhàgail na dhìmeas nas miosa buileach aca nach eil daoine a chleachdas bancaichean-bidhe feumach gu mòr air cuideachadh. Cuideachadh a bu chòir do shiostam nan sochairean a bhith a’ toirt seachad, seach buidhnean-carthannais. Cha ghabh a bhith a’ leigeil leis an t-samhla seo de shochair bho linn Dickens fàs fulang idir. Chan urrainn do gun a bhith a’ toirt feart air an duilgheadas a bhith mar chuid den fhuasgladh.”
Gu h-àraidh, tha a’ Chomataidh a’ moladh an dealais agus an rùin a nochdas luchd saor-thoileach nam bancaichean-bidhe. A dh’aindeoin seo, ge-tà, tha a’ Chomataidh ga dhèanamh soilleir nach bu chòir gun ‘snàigeadh’ solar nam bancaichean-bidhe a-steach ann an solas shochairean na stàite.
Thuirt Leas-Neach-gairm na Comataidh, Seumas Hepburn BPA:
“Thadhail na buill air fad den Chomataidh againn air bancaichean-bidhe air feadh na h-Alba. Rinn an dòigh dhreuchdail agus mhodhail san do ghabh luchd saor-thoileach gnothach ri daoine a thàinig thuca, gu tric ann an àm na h-èiginn, drùdhadh oirnn. Thathar an dòchas gun dèan gnìomh Riaghaltas na h-Alba ann a bhith a’ cruthachadh Plana-gnìomha Cobhair-bidhe ann an Èiginn cinnteach gun tèid aghaidh a thoirt air ceistean logastach sam bith mu sholar nam bancaichean-bidhe.
“Ach tha na bancaichean-bidhe fhathast nam freagairt le coimhearsnachd is carthannas do cho-shaoranaich ann an èiginn. Feumaidh Riaghaltas na Rìoghachd Aonaichte dèanamh cinnteach nach tòisich e air a bhith gan tàthadh a-steach ann an siostam nan sochairean. Feumaidh e an t-àite a tha aige fhèin ann a bhith ag adhbharachadh an àrdachaidh aideachadh agus sgur a leigeil air nach eil an seo ach daoine ag iarraidh rudeigin an-asgaidh. Tha sin na dhìmeas air na daoine as so-leònte againn a bhios a’ cleachdadh nam bancaichean-bidhe agus nan daoine saor-thoileach a bhios gan ruith. Tha e cuideachadh a’ dol às àicheadh an àite a tha aige ann a bhith a’ putadh dhaoine don oir – agus thairis oirre gu tric.”
San aithisg, tha a’ Chomataidh a’ dèanamh sgrùdaidh air tagradh Riaghaltas na Rìoghachd Aonaichte gu bheil leudachadh air sanasachd agus daoine a’ taghadh bancaichean-bidhe a chleachdadh mar “roghainnean eaconamach” as adhbhar ris an leudachadh air bancaichean-bidhe. Tha i a’ tighinn chun a’ cho-dhùnaidh:
· Gu bheil ceangal dìreach eadar ath-leasachaidhean shochairean Roinn Obrach agus Pheinnseanan agus an t-àrdachadh air cleachdadh nam bancaichean-bidhe.
· Faodar na bhios Roinn Obrach agus Pheinnseanan ag ùghdarrachadh a thaobh shochairean a mheas mar ‘adhbhar bunaiteach’ agus na bancaichean-bidhe mar ‘bhuil’.
· Ann an dùthaich air a leasachadh mar a tha againn cha bu chòir gum biodh feum air Comann na Croise Deirge, an carthannas-cuideachaidh eadar-nàiseanta, a bhith an sàs ann an solar cobhair-bidhe san Rìoghachd Aonaichte.
· Chan eil a’ Chomataidh ag aontachadh ri meas Ministearan Roinn Obrach agus Pheinnseanan gu bheil daoine a’ cur romhpa na bancaichean-bidhe a chleachdadh air a’ chuid as motha mar thoradh air cothroman soirbh agus barrachd mothachaidh. Tha a’ Chomataidh den bheachd gum bi daoine a’ taghadh nam bancaichean-bidhe le èiginn air a’ chuid as motha, bidh mòran a’ faireachdainn gu bheil iad air an comharrachadh agus nàrachadh airson gun tig orra a bhith gan cleachdadh.
· Tha e na dhragh fianais a chluinntinn gu bheil daoine ann an ceann an cosnaidh a tha air tuarastal ìseal a’ cleachdadh nam bancaichean-bidhe. Tha seo a’ cur an cèill thairis air luchd-cleachdaidh nam bancaichean-bidhe an-dràsta gu bheil mòran a bharrachd eile faisg air a bhith feumach air cobhair-bidhe.
· Thathar air teagamh a chur anns an luach a chuireas Riaghaltas na Rìoghachd Aonaichte air coimeasan eadar-nàiseanta mar dhearbhadh air an argamaid aige gu bheil cleachdadh nam bancaichean-bidhe air a threòrachadh le solar. Fhuair a’ Chomataidh fianais gun do dh’fhàs bancaichean-bidhe nan institiùid ann an Canada agus gun robh iad a’ tighinn a-steach an àite solar na stàite. Bha fianais ann cuideachd gun robh an ìre àrd de chleachdadh nam bancaichean-bidhe sa Ghearmailt ceangailte ri atharrachaidhean ann an ullachadh shochairean na stàite.
Cùl-fhiosrachadh
Dh’eas-aontaich Ailig Johnstone BPA ri 3 earrannan, mar a tha air a chomharrachadh anns an aithisg.
Leanaibh obair na Comataidh aig @sp_welfareref