Agus a’ chùis air chois fad naoi bliadhna nis, bidh ‘Gnìomhachas sa Phàrlamaid’ a’ cur aghaidh ris na mòr-cheistean a tha cudromach do ghnìomhachasan na h-Alba, agus thèid an co-labhairt seo an-diugh an gleac ri ciamar a chumar saoghal eaconamach na h-Alba sna làithean ri teachd.
Thuirt Oifigear Riaghlaidh Pàrlamaid na h-Alba, Am Fìor Urramach Tricia Marwick BPA, a bhios mar chathraiche a’ cho-labhairt:
“Mar Phàrlamaid ar nàisein, tha sinn ann an suidheachadh air leth a bhith os cionn an tachartais seo. Tha e iomchaidh gum biodh Taigh an Ròid mar fhòram do ghnìomhachasan agus do luchd-poilitigs a thaobh a dhol an sàs sa chùis agus deasbad a thogail a thaobh ciamar as fheàrr a bheir sinn cruth is cumadh air na tha an dàn do dh’Alba gu h-eaconamach.”
Thathar an dùil gun innis a’ Bh. Gadhia na leanas don cho-labhairt:
“Tha e soilleir gur mithich dhuinn gluasad air adhart o dheasbad an reifrinn. As bith dè ur beachdan, feumaidh sinn coimhead air adhart a-nis gu ath-chaibideal sgeul ar dùthcha, mar gum biodh, a’ togail air an seasmhachd eaconamach a tha an ìre mhòr air bhonn san RA.
“’S e ar dleasdanas is ar n-uallach ach toirt air tiomnadh leasaichte obrachadh air ar son, chan ann a-mhàin a thaobh eaconamachd, ach cuideachd a thaobh a bhith a’ cruthachadh fàs eaconamach agus a’ togail choimhearsnachdan soirbheachail.”
Cuiridh Murchadh Frìseal - Neach-gairm Comataidh Eaconamaidh, Lùths is Turasachd Pàrlamaid na h-Alba - an cèill adhbhar a’ cho-labhairt agus mar a ghabhas gnìomhachasan agus luchd-poilitigs co-obrachadh ri chèile.
Thathar an dùil gun can e seo:
“’S e dol-an-sàs ar prìomh amas an-diugh – gus iadsan a tha an sàs ann am poilitigs a’ ghnìomhachais a thoirt nas dlùithe riuthasan a tha an sàs ann an gnìomhachas na poilitigs.
“Chan fheum am facal prothaid a bhith mar dhroch fhacal. Bu chòir ‘s gun cuir e an cèill fàs, obraichean is cur-an-seilbh. Bu chòir 's gun cuir e an cèill beachdachadh air feumalachdan a’ chomainn-shòisealta cho math ri na tha a dhìth a thaobh eaconamaidh. Bu chòir ‘s gun cuir e an cèill gu bheilear a’ tuigsinn feumalachdan choimhearsnachdan cho math ri na tha a’ dol sa mhargadh.
Tha e buannachdail dhuinn uile gum bi Alba a’ fàs mar àite nas fheàrr a thaobh còmhnaidh is cosnaidh.”
Thuirt Rùnaire a’ Chaibineit airson Ionmhais, Fastachd is Fàs Seasmhach, Iain Swinney BPA:
“Aithnichidh Riaghaltas na h-Alba dè cho cudromach ‘s a tha e eaconamaidh na h-Alba a chothromachadh agus a chur an gnìomh gu h-às ùr. Tha sinne ag obrachadh cuide ri gnìomhachasan gus taic a thoirt dhaibh a thaobh amasan tionnsgalach agus ùr-ghnàthachadh tro bhith a’ tarraing cur-an-seilbh a-steach chugainn fhèin agus a’ cur ri bathar a chuirear a-mach asainn.
“Tha an co-labhairt seo a’ toirt an ceann a chèile raon iomfhillte de neachan is de ghnìomhachasan bho air feadh Alba gu lèir agus eòlas, tàlantan is amasan air leth aca. Tha an aon amas aig an luchd-frithealaidh gu lèir, 's e sin Alba a dh’fhàsas is a shoirbhicheas. Tha e cudromach gun obraich sinn cuide ri chèile, gun cuir sinn aghaidh ris gach dùbhlan agus gun gabh sinn làn-bhrath air na th’ ann de chothroman do ghnìomhachasan an seo ann an Alba.”
Tha an tachartas fo cho-stiùir Pàrlamaid na h-Alba is Riaghaltas na h-Alba, agus am measg na bhios a’ bruidhinn bidh:
- An t-Oifigear Riaghlaidh, Am Fìor Urramach Tricia Marwick BPA;
- A’ Chiad Mhinistear, Am Fìor Urramach Ailig Salmond BPA;
- Neach-gairm Comataidh Eaconamaidh, Lùths is Turasachd, Murchadh Frìseal BPA;
- Rùnaire a’ Chaibineit airson Ionmhais, Fastachd is Fàs Seasmhach, Iain Swinney BPA;
- Fearghus Ewing BPA, Ministear airson Lùths, Iomairtean is Turasachd;
- Brendan Dick, Àrd-stiùiriche, BT Alba
- Jo Macsween, Co-àrd-stiùiriche, Macsween of Edinburgh
- Jane Wood, Gnìomhachasan na h-Alba sa Choimhearsnachd.
Cùl-fhiosrachadh
Thèid gach seisean anns an t-Seòmar-dheasbaid a chraoladh beò air
Tbh na Pàrlamaid
Gheibhear barrachd fiosrachaidh (agus clàr iomlan) mun Cho-labhairt agus mu thachartasan eile a bha ann roimhe aig: www.businessintheparliament.org.uk