Thèid cuireadh a thoirt do na BPAan, an luchd-obrach is luchd-tadhail stad cuide ris an t-Oifigear Riaghlaidh agus i os cionn comharradh na Pàrlamaid orrasan a chaill am beatha.
An dèidh don Phàrlamaid a bhith na tost fad dhà mhionaid, cluichidh Stiùbhart Mac a' Mhaoilein BPA Flowers O' The Forest air a’ phìb.
Cuiridh an t-Oifigear Riaghlaidh crìoch air a’ chomharradh le leughadh den dàn aig Iain MacRath, In Flanders Fields.
Thuirt an t-Oifigear Riaghlaidh, Am Fìor Urramach Tricia Marwick BPA:
“Anns a’ bhliadhna chomharraidh seo air “an cogadh a chuireadh crìoch air a h-uile cogadh”, bidh sinn a’ cuimhneachadh na milleanan de dhaoine a chaochail eadar 1914-18.
“Tha mi air cur romham dàn le Iain MacRath, In Flanders Fields, a leughadh. Tha ìomhaigh làidir MhicRath den chrom-lus (poppy) air fhaicinn le mòran dhaoine mar a’ bhrosnachadh airson an fhlùir sin a chaitheas sinn aig an àm seo dhen bhliadhna.
“Thathar a’ toirt cuireadh do na BPAan uile, an luchd-obrach agus luchd-tadhail a bhith cuide ruinn air Latha seo an Fhosaidh gus smaoineachadh air buaidh uabhasach gach cogaidh, an-dràsta agus na chaidh roimhe.”
Bidh Àrd-oifigear Legion na h-Alba, Kevin Gray, a’ frithealadh na cùise, cuide ri seann saighhdearan bho Thaigh Whiteford.
Tha Legion na h-Alba a’ toirt cobhair do dh’fhir is do mhnàthan dhen a h-uile aois a bha sna feachdan thar Alba a thaobh a bhith a’ fàs cleachdte ri beatha a-mach às na feachdan sin le bhith a’ toirt seachad seirbheisean coimhearsnachd, càirdeis agus comhairle phragtigeach, eadar ‘s gun do dh’fhàg iad na seirbheisean armaichte an-dè no còrr is lethchiad bliadhna air ais.
Tha Taigh Whiteford a’ cur air dòigh ionadan-còmhnaidh le taic aig àrd-ìre ann an Dùn Èideann air sgàth nan seann saighdearan sin a tha gun dachaigh air neo air èiginn, tron Veterans Housing Association (SVHA) / Comann Taigheadais nan Seann Saighdearan (CTSS).
Ruigsinneachd nam Meadhanan
Thathar a’ toirt cuireadh do na meadhanan - camarathan Tbh agus luchd-camara nam pàipearan-naidheachd nam measg - a’ chùis a fhrithealadh. Faodaidh craoladairean a tha ag iarraidh an gnothach a fhiolmadh beò sin a dhèanamh on ionad-cur-a-steach ann an Lobaidh a’ Ghàrraidh. Cuideachd, bidh neach-camara na Pàrlamaid fhèin a’ toirt seachad ìomhaighean do na deascaichean-deilbh uile. Bheir an t-Oifigear Riaghlaidh a h-òraid aig 10:59m. Thèid a h-uile gnothach Comataidh a stad aig 11:00m.
Òrdugh Tachartasan a’ Chomharraidh
Àite: Lobaidh a’ Ghàrraidh, Pàrlamaid na h-Alba
10:45m: Àm nam Meadhanan
10:59m: An t-Oifigear Riaghlaidh a’ gairm òrdugh ‘s a’ leughadh às Ode of Remembrance
11:00m: Toiseach tost dhà-mhionaid
11:03m: An Last Post aig dùdaiche
An t-Oifigear Riaghlaidh a’ leughadh In Flanders Fields
Stiùbhart Mac a’ Mhaoilein a’ cluich Flowers O' The Forest air a’ phìb
An dùdaiche a’ cluich Reveille
11:05m: Gach rud seachad.
Gabhaidh an dàn iomlan In Flanders Fields le Iain MacRath a lorg air làrach-lìn Leabharlann Bàrdachd na h-Alba tron cheangal seo:
http://www.scottishpoetrylibrary.org.uk/poetry/poems/flanders-fields
Gabhaidh fios mu bheatha Iain MhicRath a lorg tron cheangal seo:
http://www.greatwar.co.uk/poems/john-mccrae-in-flanders-fields.htm