14.11.2014
Tha Comataidh nan Cumhachdan Tiomnaichte agus Ath-leasachadh Lagha air a taic a nochdadh do reachdas a bheir a-steach modhan nas fhasa agus nas èifeachdaiche gus cùmhnantan a dhealbh fo lagh na h-Alba.
Tha Bile nan Sgrìobhainnean Laghail (Co-shoidhneadh agus Lìbhrigeadh) (Alba) ga dhèanamh soilleir gun gabh cùmhnantan a lìbhrigeadh agus iad air an roinn nan co-chùmhnantan. Tha sin a’ ciallachadh gum faod gach buidheann no neach an lethbhreac aca fhèin den chùmhnant a shoidhneadh agus sin a roinn le daoine eile an àite mar a tha cùisean an-dràsta, far am feum aon sgrìobhainn a bhith ann a tha air a soidhneadh leis a h-uile duine no buidheann bhuntainneach.
Cuideachd fon Bhile, faodar cùmhnantan a lìbhrigeadh ann an cruth eileagtronaigeach, agus sin a’ ciallachadh nach fheumar sgrìobhainnean a chlò-bhualadh daonnan.
Fhuair a’ Chomataidh a-mach gun robh na duilgheadasan a bha an lùib an t-siostaim a th’ ann an-dràsta a’ toirt air daoine uaireannan a bhith thoirt cùmhnantan a-mach fo shiostaman lagha eile, a tha a’ ceadachadh co-chùmhnantan. Ma thèid aontachadh ris a’ bhile, dh’fhaodadh gum brosnaich e daoine gu bhith cleachdadh Lagh na h-Alba barrachd.
Thuirt Neach-gairm na Comataidh, Nigel Don BPA:
“Mar Chomataidh tha sinn a’ cur ar taic ri prionnsapalan coitcheann a’ Bhile seo.
“Ged a tha coltas ann gur e dìreach puing theicnigeach a th’ ann, bhon fhianais a fhuair sinn, bha e soilleir gun stèidhicheadh e modhan ùra fo lagh na h-Alba a bheir cothrom do ghnothachasan ann an Alba barrachd èifeachdais a chur an sàs agus airgead a shàbhaladh nuair a tha iad ag aontachadh ri cùmhnantan.
“San fharsaingeachd, bu chòir gun cuir am bile ri cliù lagh na h-Alba agus gum brosnaich e daoine gu bhith soidhneadh barrachd chùmhnantan fo lagh na h-Alba.”
Am measg molaidhean na Comataidh bha na leanas:
An siostam a th’ ann an-dràsta gus cùmhnantan a shoidhneadh:
Tha e follaiseach don Chomataidh gu bheil na duilgheadasan a tha an lùib an t-siostaim a th’ ann an-dràsta air, gu ìre, stad a chur air cuid a dhaoine cùmhnantan a shoidhneadh fo lagh na h-Alba, agus iad den bheachd gum biodh e nas fhasa an cùmhnant a chur air dòigh fo lagh Shasainn an àite a bhith dèiligeadh ris an duilgheadasan a tha an cois an t-siostaim a th’ ann an-dràsta.
Na buannachdan a dh’fhaodadh tighinn bhon bhile:
Tha a’ Chomataidh den bheachd gu bheil coltas ann gum faodar am Bile cothrom a thoirt do dhaoine barrachd èifeachdais a chur an sàs agus airgead a shàbhaladh.
Tha a’ Chomataidh den bheachd gur e aon de na buannachdan as motha a thigeadh bhon Bhile, gum biodh fios le cinnt aig daoine bhon chiad dol a-mach gum faod iad an cùmhnant a chur air dòigh fo lagh na h-Alba agus a thoirt gu buil le bhith lìbhrigeadh sgrìobhainn thraidiseanta ann an cruth dealanach.
Na dùbhlain phractaigeach an cois a’ Bhile:
Chan eil a’ Chomataidh a’ smaoineachadh gum biodh barrachd foille no mhearachdan ann, ri linn a’ Bhile, nuair a bhathar a’ soidhneadh sgrìobhainnean laghail fo lagh na h-Alba.
Ged a dh’aidich iad gum faodadh foill no mearachdan a bhith fhathast ann nuair a bha daoine a’ toirt co-chùmhnantan gu buil, bha a’ Chomataidh riaraichte gum biodh modhan-dìona freagarrach ann gus stad a chur air sin cho fad ’s a b’ urrainnear.
Cùisean buntainneach:
Tha a’ Chomataidh a’ cur a taic ri bhith cleachdadh ainmean-sgrìobhte eileagtronaigeach, agus iad den bheachd gur e dòigh thèarainte a th’ ann cùmhnantan aontachadh agus gun cuidich iad ann a bhith cur stad air foill is mearachdan.
Mar sin, tha a’ Chomataidh a’ cur a taic ris na h-oidhirpean a tha gan dèanamh gus an tèid an cleachdadh barrachd, agus tha iad a’ cur fàilte air an sgeama chairtean SMART eileagtronaigeach aig Comann Lagh na h-Alba a bheir ainm-sgrìobhte eileagtronaigeach don a h-uile ball aca.
Cùl-fhiosrachadh
Ghabh a’ Chomataidh fianais bheòil air a’ Bhile thairis air còig seiseanan eadar an t-Ògmhios is an Dàmhair. Fhuaras fianais bho ghrunn bhuidhnean lagha, companaidhean lagha coimeirsealta, gnothachasan is sgoilearan, agus bho Chlàraidhean na h-Alba, Coimisean Lagh na h-Alba (SLC) agus am Ministear airson Cumhachd, Iomairtean agus Turasachd.
Seo a’ chiad Bhile bho Choimisean Lagh na h-Alba (Bile SLC) air an do bheachdaich a’ Chomataidh bho chaidh Gnàth-riaghailtean na Comataidh agus bunaitean na Comataidh atharrachadh, agus sin a’ ciallachadh gum faod iad a bhith mar phrìomh bhuidheann sgrùdaidh airson cuid a Bhilean SLC.
No gheibhear barrachd fiosrachaidh air YouTube