18.11.2014
Tha an ath shreath de Làithean na Pàrlamaid gu bhith a' tachairt ann an trì àiteachan a bharrachd air feadh Alba, chaidh ainmeachadh. Bidh na h-àiteachan seo a' toirt fàilte do Phàrlamaid na h-Alba thairis air na mìosan ri teachd.
Tha Làtha na Pàrlamaid ag amas air a’ Phàrlamaid a thoirt a-mach à Dùn Èideann agus a-steach do choimhearsnachdan mu thimcheall Alba, a’ toirt misneachd do dhaoine ann an coimhearsnachdan ùidh a thoirt anns a’ Phàrlamaid agus a bhith an sàs anns an obair a th’ aice.
B’ e an t-Oifigear Riaghlaidh, am Fìor Urr. Tricia Marwick BPA, a thòisich Làithean na Pàrlamaid ann an 2012 agus tha i airson fòcas fiù ’s nas motha a bhith air bruidhinn ri daoine air feadh Alba, le taic bho bharrachd Làithean na Pàrlamaid.
Thuirt an t-Oifigear Riaghlaidh gum bi i a’ gabhail pàirt anns na tachartasan a leanas:
Latha na Pàrlamaid ann an Inbhir Lìobhann air Diluain 8 Dùbhlachd 2014 còmhla ri Comataidh Tiomnadh Chumhachdan (A Bharrachd) do dh’Alba.
- Latha na Pàrlamaid ann an Dùn Phris air Diluain 23 Gearran 2015 còmhla ri Comataidh Athchuingean Poblach.
- Latha na Pàrlamaid ann an Kirkwall air Diluain 8 Ògmhios 2015 còmhla ri Comataidh Cùisean Dùthchail, Atharrachadh Clìomaid agus na h-Àrainneachd.
Mus tòisich Latha na Pàrlamaid anns a’ Ghearasdan, a’ tachairt an ath sheachdain (Diluain 24 Samhain), thuirt an t-Oifigear Riaghlaidh:
“ ’S ann aig muinntir na h-Alba gu lèir a tha a’ Phàrlamaid, agus ’s ann air an adhbhar sin a tha sinn a-nis a’ dèanamh tadhal air coimhearsnachdan leithid Inbhir Lìobhann ann am Fiobha a bharrachd air àiteachan a tha nas fhaide air falbh, leithid Kirkwall agus Dùn Phris.”
“Tha fhios againn gu bheil muinntir na h-Alba ag iarraidh a bhith an sàs anns a’ phròiseas phoilitigeach agus mar sin tha mi airson gum bi a’ Phàrlamaid a’ faighinn a-mach agus mu thimcheall Alba fiù ’s nas trice.”
Tha Latha na Pàrlamaid a’ toirt fiathachadh do dhaoine a bhith a’ faicinn na Pàrlamaid air an son fhèin, co-dhiù ge be an lùib “ghnothaichean oifigeil” no aig ìre nas neo-fhoirmeil. Tha seo a’ cuideachadh na Pàrlamaid a bhith ag èisteachd ri daoine ionadail.
Thuirt a’ Bh. ph. Marwick:
“Seo cothrom do dhaoine a bhith a’ faighinn a-mach barrachd fiosrachaidh mu dheidhinn na Pàrlamaid agus airson Buill na Pàrlamaid a bhith a’ faighinn barrachd fiosrachaidh mu dheidhinn nan cùisean a tha cudromach do dhaoine.”
Fhad ’s a bhios gach Latha na Pàrlamaid eadar-dhealaichte a rèir na coimhearsnachd a bhios a’ toirt fàilte dhith, is tric gum bi tachartasan leithid: a’ tadhal air buidhnean ionadail, gnìomhachasan is buidhnean eile; coinneamhan poblach nan comataidhean; agus gum bi BPA a’ tadhal air sgoiltean ionadail.
Foillsichear barrachd fiosrachadh air Làithean na Pàrlamaid ann an ùine ri tighinn agus bidh seo air a cur an cèill gu h-ionadail, leis an amas a bhith a’ dèanamh cinnteach gum bi fios aig na h-uiread ’s a ghabhas gu bheil Latha na Pàrlamaid a’ tachairt anns an sgìre aca.
Cùl-fhiosrachadh
Làithean na Pàrlamaid gu ruige seo:
24 Gearran 2014 - Dùn Breatann
4 Samhain 2013 - Obar Bhrothaig
21 Ògmhios 2013 - Sruighlea
15 Màrt 2013 - Steòrnabhagh
5 Samhain 2012 - Hawick
Airson barrachd fiosrachaidh, tadhail air www.scottish.parliament.uk/parliamentdays
Faodaidh tu a bhith gar leantail air Twitter cuideachd @scotparl agus @TrishaMarwickPO