Pàirce Roinneil Monadh Pentland – tha Comataidh a’ faighneachd, am bu chòir dhi a bhith air a leudachadh?

 

Dè bhuaidh a bhiodh ann nan rachadh Pàirce Roinneil Monadh Pentland a leudachadh? Sin dìreach aon de na ceistean a tha Pàrlamaid na h-Alba gu bhith faighneachd agus i a’ tòiseachadh air beachdachadh air Bile Crìochan Pàirce Roinneil Monadh Pentland. 

Tha am Bile, a thug Cairistìona Ghreumach BPA a-steach, ag amas air Pàirce Roinneil Monadh Pentland mar a tha i an-dràsta a leudachadh feuch am biodh gach ceàrnaidh de Mhonadh Pentland air a dìon agus air a gleidheadh chun na h-aon ìre.

Tha Comataidh Bile Crìochan Pàirce Roinneil Monadh Pentland a-nis ag iarraidh cluinntinn bhon a h-uile duine air am faodadh an leudachadh buaidh a thoirt, agus tha iad airson faighinn a-mach dè bhuaidh a dh’fhaodadh a bhith ann ma thèid crìochan na pàirce atharrachadh.

Thuirt Neach-gairm na Comataidh, Seumas Ó Dornáin BPA:

“Bidh mìltean de dhaoine a’ tadhal air agus a’ dèanamh feum de Mhonadh Pentland mar aon de na h-àiteachan as taitniche ann an Alba.

“Tha am Bile a’ moladh a’ phàirce roinneil mar a tha i an-dràsta a leudachadh gu bhith còmhdach a’ chuid as motha de Mhonadh Pentland. Tha am Monadh a’ sìneadh thar còrr is 20 mìle agus chan e a-mhàin gur e àite air leth brèagha a th’ ann air am faod daoine tadhal, ach cuideachd tha tòrr dhaoine a’ fuireach agus ag obair san sgìre.

“Tha a’ Chomataidh airson faighinn a-mach dè a’ bhuaidh a bhiodh ann nan deigheadh crìochan na pàirce a leudachadh. Tha sinn airson cluinntinn bho na daoine fhèin dè na buannachdan agus dè na h-anacothroman a bhiodh ann nan deigheadh na molaidhean seo a chur an sàs. Sin an aon dòigh a nì sinn cinnteach gun dèan am Bile diofar dha-rìribh mar a thathar ag iarraidh.”

Tha a’ Chomataidh airson cluinntinn bhon a h-uile duine air an toir an t-atharrachadh a thathar a’ moladh buaidh. Tha a’ Chomataidh gu h-àraidh airson faighneachd:

• Dè na buannachdan is anacothroman a bhiodh ann dhutsa nan rachadh na crìochan a leudachadh?

• Càit am faighear am maoineachadh, a tha dhìth air na h-ùghdarrasan ionadail, gus cuideachadh le bhith leudachadh nan crìochan?

• Am feumadh na modhan-riaghlaidh a th’ ann an-dràsta tharrachadh gus taic a thoirt do bhith leudachadh nan crìochan; nam feumadh, dè na h-atharraichean a bhiodh a dhìth?

 

Cùl-fhiosrachadh

Chaidh am Bile a thoirt a-steach sa Ghiblean 2015, agus tha e na amas dha, “a’ Phàirce Roinneil a th’ ann a leudachadh gu bhith gabhail a-steach Monadh Pentland air fad (no cha mhòr air fad), agus nì sin cinnteach gum bi e uile air a dhìon agus gun tèid co-dhùnaidhean a thaobh mar a thèid am fearann a chleachdadh agus a ghleidheadh san ùine-fhada a dhèanamh a rèir prìomh amasan na Pàirce Roinneil”. 

Cha bu chòir barrachd air ceithir duilleagan A4 de bheachdan a bhith air an cur a-steach. Bu chòir freagairtean a chur, nuair as urrainnear, ann am post-d agus ann an sgrìobhainn MS Word chun an t-seòlaidh puist-d seo: PentlandParkBill.Committee@scottish.parliament.uk

Mus cuir thu fianais a-steach, feuch gun leugh thu poileasaidh na Pàrlamaid air mar a bu chòir do chomataidhean cuspaireil is àithneil dèiligeadh ri fianais sgrìobhte (faic gu h-ìosal). 

Faodar cuideachd freagairtean a chur sa phost gu:

Clàrc Comataidh Bile Crìochan Pàirce Roinneil Monadh Pentland

Oifis nan Comataidhean

Seòmar T3.40

Pàrlamaid na h-Alba

Dùn Èideann

EH99 1SP

 

Tha an ceann-latha airson fianais, 6f air Dihaoine 28 Sultain 2015. 

Thathar a' cur fàilte air fianais anns a' Ghàidhlig.