Sgrùdadh air Bile Alba aig Riaghaltas na Rìoghachd Aonaichte air ais air clàr-gnothaich Thaigh an Ròid

02.09.2015

Tha sgrùdadh air Bile Alba, a chaidh a thoirt a-steach le Riaghaltas na Rìoghachd Aonaichte, air ais air clàr-gnothaich Thaigh an Ròid, agus Comataidh Fèin-riaghlaidh (Cumhachdan A Bharrachd) a’ deisealachadh a chluinntinn bho shàr-eòlaichean air raon de chuspairean ris a bheil am Bile a’ dèiligeadh.

Chrìochnaich Bile na h-Alba an Ìre Comataidh ann an Taigh nan Cumantan anns an Iuchar, agus thathar an dùil gun lean am Bile air an t-slighe phàrlamaidich aige mus tèid e gu Taigh nam Morairean.

Air Diardaoin, bidh a’ Chomataidh a’ cluinntinn bho dhà phannal de shàr-eòlaichean. Bidh a’ chiad phannal a’ bruidhinn air cuspairean leithid maireannachd Pàrlamaid na h-Alba, Gluasadan Sewel agus co-ionnanachdan. Bidh an dàrna pannal a’ bruidhinn air sochairean. Ann an coinneamhan eile a tha air clàr-gnothaich na Comataidh sa mhìos seo, bidh a’ Chomataidh a’ cluinntinn bho shàr-eòlaichean, gach cuid eadar-nàiseanta agus nàiseanta, air ceanglaichean eadar-riaghaltasan.

Thuirt Neach-gairm na Comataidh Brus Crawford:

“Bhon a dh’fhoillsich sinn an aithisg eadar-amail againn air an dreachd de na clàsan reachdail de Bhile Alba anns a’ Chèitean, tha sinn air ìmpidh a chur air Riaghaltas na Rìoghachd Aonaichte gus molaidhean Coimisean Mhic a’ Ghobhainn a thoirt gu buil gu h-iomlan.

“Tha e deatamach gu bheil am Bile a’ solarachadh frèam reachdail a tha ag obair gus cumhachdan a thiomnachadh gu Taigh an Ròid, mar a chuir prìomh phàrtaidhean na h-Alba an ainmean ris. ’S ann air an adhbhar sin a bhios an sgrùdadh a nì sinne air a’ Bhile cho cudromach, agus bidh an raon de luchd-fianais a chluinneas sinn thairis air an trì seachdainean ri thighinn a’ toirt dhuinn geur-bheachd nan sàr-eòlaichean air prìomh eileamaidean a’ Bhile.

“Cha bhi mòran ùine a bharrachd ann airson dèanamh cinnteach gu bheil Westminster n a’ gabhail ri Bile na h-Alba a lìbhrigeas na bha Coimisean Mhic a’ Ghobhainn ag aontachadh a bhiodh riatanach agus cothromach.”

Cùl-fhiosrachadh

Air Diardaoin 3 Sultain, bidh a’ Chomataidh a’ cluinntinn bho dhà phannal de luchd-fianais. Air a’ chiad phannal, a’ dèiligeadh ri cùisean bun-reachdail agus ri co-ionnanachdan, bidh: Mìcheal Clancy, Comann Lagha na h-Alba; an t-Àrd-ollamh Niall Walker, Roinn Lagh Bun-reachdail agus Rianachail, Oilthigh Dhùn Èideann; Talat Yaqoob, Cathraiche, Women 50:50; agus Emma Ritch, Stiùiriche-gnìomha, Engender Scotland.

Air an dàrna pannal, a’ dèiligeadh ri sochairean, bidh: John Dickie, Stiùiriche, Child Poverty Action Group (Alba); Nile Istephan, Leas-chathraiche, Caidreachas Albannach nan Comann Taigheadas; Bill Scott, Stiùiriche Poileasaidh, Inclusion Scotland; agus Rachel Stewart, Oifigear Ghnothaichean Poblaich, Comann Albannach airson Slàinte Inntinn.

Aig na coinneamhan aice air 10 agus 17 Sultain, bidh a’ Chomataidh a’ cluinntinn bho shàr-eòlaichean air raon de chuspairean, ceanglaichean eadar-riaghaltasan nam measg. Gheibhear barrachd fiosrachaidh air obair na Comataidh, leithid tagraidhean sgrìobhte bhon luchd-fianais agus aithisg eadar-amail na Comataidh air an dreachd de na clàsan reachdail, aig:

Comataidh Fèin-riaghlaidh (Cumhachdan A Bharrachd)