14.09.2015
An dèan na planaichean gus pàirceadh air cabhsairean a pheanasachadh diofar dhutsa? Tha Comataidh Riaghaltas Ionadail is Ath-bheothachadh ann am Pàrlamaid na h-Alba airson cluinntinn bho dhaoine bho air feadh na h-Alba, agus a’ Chomataidh a’ tòiseachadh a cuid sgrùdaidh air Bile Pàirceadh air Slighean-coise is Pàirceadh Dùbailte (Alba).
’Se amas a’ Bhile gum bi e mì-laghail a bhith a’ pàirceadh air slighean-coise (cabhsairean) agus gum bi cabhsairean nas sàbhailte mura feum luchd-coiseachd—gu h-àraid iadsan aig a bheil ciorram a thaobh gluasad no fradharc - a bhith a’ cleachdadh nan rathad gus càraichean pàircichte a sheachnadh.
Cruthaichidh am Bile eucoirean ùra: pàirceadh ri taobh oir a’ chabhsair a tha ìslichte, agus pàirceadh dùbailte.
Thuirt Neach-gairm na Comataidh Caoimhin Stiùbhart BPA:
“Tha pàirceadh air cabhsairean no pàirceadh dùbailte draghail agus cunnartach do luchd-coiseachd uile. Ach airson feadhainn de na daoine as so-leònte (most vulnerable) anns a’ choimhearsnachd againn, leithid seann daoine agus iadsan aig a bheil ciorram a thaobh gluasad no fradharc, tha a’ bhuaidh fiù ’s nas miosa.
“Tha am Bile seo airson an leithid seo de phàirceadh a bhacadh, agus tha sinne airson faighinn a-mach dè’n diofar a dhèanadh sin. A bheil am Bile a’ dol fada gu leòr, agus am bi na molaidhean seo dha-rìribh a’ stad dhaoine bho phàirceadh air cabhsairean?”
Tha a’ Chomataidh a’ faighneachd a bheil daoine a’ faicinn pàirceadh mar sin anns na coimhearsnachdan aca. A bheil am poball air an co-èigneachadh bhàrr a’ chabhsair, no air am bacadh bho bhith a’ cleachdadh oir ìslichte a’ chabhsair, air sàilleabh chàraichean pàircichte? Am bu chòir don Bhile an leithid seo de phàirceadh a cheadachadh ann an suidheachaidhean àraid no ann an àitean àraid anns a’ choimhearsnachd?
Cùl-fhiosrachadh
’Se amas a’ Bhile a bhith a’ bacadh dhaoine bho chnap-starraidhean a chur air slighean-coise gach cuid bho chàraichean a tha pàircichte no a tha a’ feitheamh agus bho charbadan air am pàirceadh gu dùbailte air slighean-carbaid. Fo reachdas làithreach, tha e na eucoir a bhith a’ dràibheadh air slighe-coise, ach tha an suidheachadh nas neo-shoilleire a thaobh pàirceadh corra-uair no gu tuiteamach.
Gu sònraichte, bhiodh am Bile a’ bacadh pàirceadh air slighe-coise no slighe-coise ìslichte sam bith a bharrachd air pàirceadh dùbailte (far nach eil pàirt sam bith den charbad taobh a-staigh 50cm bho oir na slighe-carbaid) air a h-uile rathad poblach ann an sgìrean bailteil ann an Alba.
A bharrachd air gairm airson fianais sgrìobhte, tha a’ Chomataidh air suirbhidh fhoillseachadh a tha a’ sireadh fiosrachadh air dè na duilgheadasan a dh’adhbharaicheadh le pàirceadh air cabhsairean. Gheibhear an suirbhidh tron cheangal a leanas:
http://www.smartsurvey.co.uk/s/FootwayDoubleParkingBill/
Cha bu chòir barrachd air ceithir duilleagan A4 de bheachdan a bhith air an cur a-steach. Bu chòir freagairtean a chur, nuair as urrainnear, ann am post-d agus ann an sgrìobhainn MS Word chun an t-seòlaidh puist-d seo: lgr.committee@scottish.parliament.uk
’Se an ceann-latha airson fianais Dihaoine 30 Damhair 2015 aig 5f.
Mus cuir thu fianais a-steach, feuch gun leugh thu poileasaidh na Pàrlamaid air mar a bu chòir do chomataidhean cuspaireil is àithneil dèiligeadh ri fianais sgrìobhte.
Faodar cuideachd freagairtean a chur sa phost gu:
Clàrc Comataidh Riaghaltas Ionadail is Ath-bheothachadh
Oifis nan Comataidhean
Seòmar T3.40
Pàrlamaid na h-Alba
Dùn Èideann
EH99 1SP