17.09.2015
Bidh an suidheachadh èiginneach a th’ ann a thaobh fògarraich agus reifreann an AE am measg nan cuspairean air am bidh Tosgaire Luxembourg a’ bruidhinn nuair a thig e air beulaibh Comataidh Eòrpach is Dàimhean Taobh A-muigh Pàrlamaid na h-Alba agus e ag innse dhaibh mu na prìomhachasan a th’ aig an dùthaich aige agus i air Ceannas an Aonaidh Eòrpaich a ghabhail os làimh.
Bidh an Tosgaire, A Shoillse Pàdraig Engelberg, a’ bruidhinn ris a’ Chomataidh aig coinneamh a-màireach (Diardaoin 17 Sultain).
A’ bruidhinn ron choinneimh, thuirt Neach-gairm an Comataidh Cairistìona NicShealbhaich BPA:
“Le bhith gabhail Ceannas an Aonaidh Eòrpaich os làimh, tha cothrom aig Luxembourg ceannas is stiùir a thoirt dhuinn gus fuasgladh fhaighinn air càs nam fògarrach. Tha a’ Chomataidh air aontachadh coimhead gun dàil air an taic a tha fògarraich a thig a dh’Alba a’ faighinn agus gabhaidh sinn an cothrom seo gus faighneachd dè na ceumannan a tha Luxembourg, agus i air Ceannas an Aonaidh Eòrpaich a ghabhail os làimh, an dùil a ghabhail gus fuasgladh farsaing fhaighinn air a’ chuis-èiginn seo a tha a’ bualadh air an AE air fad.”
Ghabh Luxembourg Ceannas Comhairle an Aonaidh Eòrpaich os làimh air 1 Iuchar 2015 bho Latbhia, tha an ceannas a’ maireachdainn sia mìosan.
Mus toir an Tosgaire fianais seachad, cluinnidh a’ Chomataidh bho Mhinistear na h-Eòrpa aig Riaghaltas na h-Alba Humza Yousaf BPA air na prìomhachasan a th’ aig Riaghaltas na h-Alba a thaobh na h-Eòrpa agus mun obair a tha a’ bhuidheann-ghnìomha airson fògarraich a’ dèanamh, buidheann a chaidh a stèidheachadh o chionn ghoirid agus air a bheil am Ministear na Chathraiche.
Lean a’ Bha-uas NicShealbhaich:
“Bheir a’ Chomataidh sùil air na tha Alba a’ dèanamh, nas urrainn dhi a dhèanamh agus air na bu chòir dhuinn a bhith dèanamh gus taic a thoirt do na mìltean de dh’fhir, boireannaich is clann a tha a’ sireadh faochadh san Roinn Eòrpa bho chogaidhean, gort is bochdainn. Tha mi a’ coimhead air adhart ri aithris a chluinntinn bhon Mhinistear air mar a tha cùisean nuair a thig e air beulaibh na Comataidh.”
Bidh dùthaich ùr a’ gabhail Ceannas an Aonaidh Eòrpaich os làimh a h-uile sia mìosan. Tha sia prìomhachasan gu bhith aig Luxembourg leis a’ Cheannas aice:
- a’ brosnachadh dhaoine gu bhith cur airgead an seilbh gus fàs eaconamach is an àireamh chosnaidhean a chur am meud;
- a’ togail air an taobh shòisealta den AE;
- a’ stiùireadh imrich, a’ gabhail a-steach saorsa, ceartas agus tèarainteachd;
- a’ toirt togail às ùr don mhargaidh shingilte agus iad a’ cur cudrom air an taobh dhidseatach dhith;
- a’ suidheachadh farpaiseachd an AE taobh a-staigh frèam cruinneil is follaiseach;
- a’ cur leasachaidhean seasmhach air adhart; agus
- a’ neartachadh an àite a th’ aig an AE san t-saoghal air fad
Thathar an dùil gum beachdaidh a’ Chomataidh, às dèidh na coinneimh Diardaoin, air barrachd obrach a dhèanamh gus dèiligeadh ri càs nam fògarrach.
Cùl-fhiosrachadh
Bidh Coinneamh na Comataidh Eòrpach is Dàimhean Taobh A-muigh, air Diardaoin 17 Sultain, ann an Seòmar Raibeirt Burns, Seòmar-comataidh 1, a’ tòiseachadh aig 9:15m le fianais bho Humza Yousaf BPA, am Ministear airson na h-Eòrpa is Leasachadh Eadar-nàiseanta. Thathar an dùil gun tòisichear an Tosgaire a’ toirt fianais seachad mu 10:15m.
Thèid coinneamh na Comataidh a chraoladh air an eadar-lìon: http://www.scottishparliament.tv/?vid=live-committee-room-1 no faodaidh tu tiogaidean a ghleidheadh le bhith cur post-d gu sp.bookings@scottish.parliament.uk / 0131 348 5200 no fònadh gu saor-fòn 0800 092 7600 (Daoine le fòn-teacsa: 0800 092 7100).
Gheibhear dealbhan den tachartas an-asgaidh. Cuir fios gu andrew.cowan@scottish.parliament.uk airson dealbhan.