28.09.2015
Tha Comataidh aig Pàrlamaid na h-Alba air fhoillseachadh an-diugh gu bheil dùbhlain air èirigh an lùib na h-obrach gus colaistean ann an Alba a chur còmhla agus gu bheil tuilleadh fiosrachaidh a dhìth gus an urrainnear a ràdh gu bheil an obair sin air soirbheachadh.
Thug Chomataidh Sgrùdadh Poblach grunn bheachdan is molaidhean seachad san aithisg aca, ‘Aithisg air Colaistean na h-Alba 2015’, agus thog iad draghan mu: cho fìor agus a bha e gun robh airgead ga shàbhaladh tro èifeachdas; a’ bhuaidh a bh’ ann air luchd-obrach is oileanaich; cho cunntachail agus a bha Stèidheachdan Neo-eisimeileach (ALFs); agus mar a chaidh dèiligeadh ri pàigheadh-crìochnachaidh do dhaoine a bha a’ fàgail nan dreuchdan aca san roinn.
Thuirt Neach-gairm aig a’ Chomataidh Sgrùdadh Poblach Pòl Màrtainn BPA:
“Tha fios againn gu bheil e gu math doirbh, nuair a thig e gu bhith cur buidhnean còmhla, measadh ceart a dhèanamh air cosgaisean agus air an airgead a thathar an dùil a shàbhaladh. Thuirt Riaghaltas na h-Alba ris a’ Chomataidh gun rachadh ealla a ghabhail ri molaidhean a chomharraich an Àrd-neach-sgrùdaidh stèidhichte air an eòlas a fhuaras bho thursan eile a chaidh buidhnean poblach a chur còmhla. Mar sin ’s e briseadh-dùil a th’ ann nach deach aig Riaghaltas na h-Alba no Comhairle Mhaoineachaidh na h-Alba fhathast air figearan mionaideach a thoirt seachad gus sealltainn mar a chaidh airgead a shàbhaladh tro èifeachdas.
“Chaidh iomradh gu tric a thoirt air mar a bhathar a’ dol a shàbhaladh £50m, ach cha d’ fhuair sinn fianais gu leòr fhathast gus sin a dhearbhadh agus dh’iarr sinn soillearachadh air a’ chlàr-ama a th’ ann gus an t-sùim seo a shàbhaladh. Air sàillibh nan cosgaisean a bhios ag èirigh bho bhith cur buidhnean còmhla agus na draghan a th’ ann a thaobh cuid de na suimeannan a fhuair daoine nuair a dh’fhàg iad na dreuchdan aca, tha sinn air fiosrachadh nas mionaidiche iarraidh bho Riaghaltas na h-Alba air na cosgaisean airson buidhnean a chur còmhla agus air an airgead a chaidh a shàbhaladh.
“Cuideachd, ged a tha a’ Chomataidh a’ tuigsinn carson a tha colaistean a’ dèanamh feum de Stèidheachdan Neo-eisimeileach (ALFs), tha sinn ag iarraidh barrachd soillearachaidh air mar a thèid an cleachdadh agus sin fhaighinn tro bhith leudachadh reachdas Saorsa an Fhiosrachaidh gus an gabhail a-steach.
“Tha sinn a’ gabhail ris an toradh bho rannsachadh an Àrd-neach-sgrùdaidh gun robh am planadh airson buidhnean a chur còmhla san fharsaingeachd math, ach tha sinn a’ sireadh barrachd fianais air na buannachdan a thathar a’ cumail a-mach a th’ ann.”
’S iad an dà cholaiste far an robh “uireasbhaidhean nach beag” sa phròiseas gus pàigheadh-crìochnachaidh a thoirt do luchd-obrach, Colaiste Ceann a Tuath Ghlaschu agus Colaiste Coatbridge. Tha a’ Chomataidh Sgrùdadh Poblach fhathast a’ toirt sùil air aithisgean bhon Àrd-neach-sgrùdaidh air an dà cholaiste sin.
Cùl-fhiosrachadh
Gheibhear an aithisg bhuntainneach bho Sgrùdadh an h-Alba an seo http://www.audit-scotland.gov.uk/docs/central/2015/nr_150402_scotlands_colleges.pdf